Azərbaycanda “Resurs İqtisadçılar Klubu” /RİK/ fəaliyyətə başlayıb

Bakı/07.04.22/Turan: Azərbaycanda “Resurs İqtisadçılar Klubu” /RİK/ fəaliyyətə başlayıb.

Təşkilatın yaydığı məlumata görə, Klub keyfiyyətli və aydın iqtisadi informasiyanı çatdırmaqla cəmiyyətin məlumatlılığını artırmaq, əhatəli araşdırmalarla sosial-iqtisadi çağırışlara diqqət yönəltmək məqsədi ilə qurulub. «Klub ölkədəki gənc iqtisadçıları ətrafında birləşdirərək onların bilik və bacarıqlarının artırılmasını və keyfiyyətli araşdırmaların sayının çoxaldılmasını hədəfləyir».

Məlumatda deyilir ki, Klubun yaradılması ideyası ölkə iqtisadiyyatının dayanıqlı inkişafına kömək edə biləcək tədqiqat və araşdırmaların ərsəyə gəlməsini, eləcə də ölkədə yeni gənc iqtisadi tədqiqatçıların formalaşmasını hədəfləyən bir qrup gənc iqtisadçı tərəfindən düşünülüb. «Klub öz fəaliyyətinin həyata keçirilməsində şəffaflıq, yüksək idarəetmə və hesabatlıq prinsiplərinə əməl etməyi öhdəsinə götürüb». 

Qeyd olunub ki, “Resurs İqtisadçılar Klubu” tədqiqatlar, seminarlar, müzakirələr və digər layihələr vasitəsilə cəmiyyəti və ictimaiyyəti bilgiləndirən, eyni zamanda, istinad edilən məlumat mənbəyi olan, yenilikçi və qabaqcıl bir iqtisadi düşüncə mərkəzi olmağı hədəfləyir.  

“Resurs İqtisadçılar Klubu”nun əsas hədəflərindən biri də davamlı olaraq təhsil almaq istəyən və yeni məzun olan gənc iqtisadçıları kluba cəlb etməkdir. «Bu baxımdan RİK həm yeni iqtisadçıların bilik və bacarıqlarının artırılmasını, həm də onların şəbəkələşməsini hədəfləyir». 

“Resurs İqtisadçılar Klubu”nun əlaqələndiricisi iqtisadçı Fərid Mehralızadədir.

Əlavə məlumatı https://www.facebook.com/resursecoklub səhifəsindən almaq mümkündür. --0--