AZƏRBAYCAN RESPUBLİKASI KONSTİTUSİYA MƏHKƏMƏSİNİN SƏDRİ CƏNAB FƏRHAD ABDULLAYEVƏ AÇIQ MÜRACİƏT

Hörmətli Fərhad Abdullayev,

Uzun müddətdir ki, kütləvi informasiya vasitələrindən istifadə edərək, sizə müraciət etməkdən çəkinirdim, lakin Azərbaycan Respublikası Konstitusiya Məhkəməsinin İnternet saytında yerləşdirilmiş vətəndaşların qəbulu üzrə cədvələ baxmayaraq, işçilərinizin sizinlə görüş təyin etməkdən qəti şəkildə imtina etməsi məni məcbur etdi ki bu, təəssüflər olsun ki, yeganə mümkün olan yolla səsimi sizə çatdırım.

17 may 2021-ci il tarixində Azərbaycan Respublikası Ali Məhkəməsinin 9 iyun 2020-ci il tarixli qərarından Konstitusiya Məhkəməsinə şikayət vermişəm. Şikayətə əlavə edilən sənədlər arasında mənim əlavə kassasiya şikayətimin Azərbaycan Respublikası Ali Məhkəməsinin Plenumuna çıxarılmaması barədə Azərbaycan Respublikası Ali Məhkəməsinin 19 noyabr 2020-ci il tarixli imtina qərardadı da olub. Bu tarixə əsasən, Konstitusiya Məhkəməsinə şikayət vemək müddəti 2021-ci ilin mayın 19-da sona çatırdı. Şikayət bu tarixdən iki gün əvvəl verilib. Şikayət rəsmi qeydiyyata alınaraq, Konstitusiya Məhkəməsi Aparatının vətəndaşların qəbulu və şikayətləri ilə iş şöbəsinin müdiri Anar Cəfərov tərəfindən qəbul edilib.

Altı ay keçdi. 11 noyabr 2021-ci il tarixində poçt vasitəsilə Konstitusiya Məhkəməsindən şikayətimə yazılı cavab aldım. Azərbaycan Pespublikası Konstitusiya Məhkəməsi Palatasının 22 oktyabr 2021-ci il tarixli qərardadı ilə Konstitusiya Məhkəməsi Plenumunun icraatına dair şikayətimin qəbulu təmin edilməyib.

İmtinanın səbəbi: Konstitusiya Məhkəməsinə şikayətimi 2021-ci ilin mayın 17-də deyil, güya 22 sentyabr 2021-ci il tarixində vermişəm. Bununla da,şikayət vermək üçün nəzərdə tutulmuş müddəti ötürmüşəm. Mənə bu vaxta kimi anlaşılan cavab verilməyib: niyə məhz sentyabrın 22-də, nə bundan qabaq, nə də bundan sonra. Ümumiyyətlə, tavandan götürülmüş bu rəqəm necə və haradan gəlib çıxıb?

Vəziyyəti aydınlaşdırmaq üçün 2021-ci il noyabrın 12-də Konstitusiya Məhkəməsinə gəldim. Amma heç nəyi öyrənə bilmədim, çünki 17 may 2021-ci il tarixində şikayətimi qəbul edən Konstitusiya Məhkəməsi Aparatının vətəndaşların qəbulu və şikayətləri ilə iş şöbəsinin müdiri Anar Cəfərov bu yaşanan anlaşılmazlığa işıq salmaqla bağlı təbii istəyimə nədənsə kəskin etiraz etdi və dedi ki, Konstitusiya Məhkəməsində vətəndaşların qəbulu ilə yalnız o, məşğul olur. Onun normal məntiqdən üzaq bu sözlərindən belə çıxırdı ki, nə məhkəmənin sədri, nə onun müavini, nə də məhkəmə aparatının rəhbəri və ümumiyyətlə, məhkəmə işçilərinin heç biri vətəndaşları qəbul etmir. Konstitusiya Məhkəməsinin saytında Kostitusiya Məhkəməsi rəhbərliyinin vətəndaşların qəbulu üzrə cədvəlin yerləşdirilməsi ilə bağlı etirazlarım cavabsız qaldı.

Necə oldu ki, imtina qərardadını imzalayan dörd hakimin hamısı verdiyim şikayətin tarixində səhvə yol verdi? Necə oldu ki, dörd hakimin hamısı mənim əlavə kassasiya ilə bağlı Ali Məhkəmənin imtina qərardadını görmədi? Mənim bu suallarıma Anar Cəfərov cavab tapmadı və mənə məsləhət gördü ki, bu məsələ ilə bağlı Konstitusiya Məhkəməsinin sədrinə rəsmi ərizə yazım.

24 noyabr 2021-ci il tarixində sizə ünvanlanmış müvafiq ərizə ilə yenidən Konstitusiya Məhkəməsinə gəldim və bu ərizəni rəsmi qeydiyyatdan keçirərək həmin Anar Cəfərova təhvil verdim. Ərizəmə cavab poçtla 12 yanvar 2022-ci ildə gəldi.

Məhkəmə sədrinin yerinə Anar Cəfərov tərəfindən yazılan və imzalanan 05 yanvar 2022-ci il tarixli 17/11-Ə-193 nömrəli formal, başdansovdu bu cavab yerli-yersiz tamamilə: “Konstitusiya Məhkəməsi haqqında” qanunun maddələrinin sadalanmasından ibarətdir və mahiyyətcə, ərizəmdə göstərilən məsələlərə heç bir aydın cavab vermədi.

Anar Cəfərov dəfələrlə qəbula yazılmaq, ya da heç olmasa daxili telefonla məhkəmə sədrinin köməkçisinə zəng etmək cəhdlərimin qarşısını istehzalı rişxəndlə alırdı. Hər şeyə icazəli olduğuna və cəzasızlığına arxayın olan Anar Cəfərov barəsində rəsmi şikayət yazmağımı və ya məhkəmə sədrinə sosial şəbəkələr vasitəsilə müraciət etməyimi məsləhət verməyə başladı.

Şikayət yazmadım, çünki bilirdim: cavabını yenə də Anar Cəfərov verəcək. Konstitusiya Məhkəməsi sədrinin köməkçisi Çingiz Musayevin iş telefonunun nömrəsini öyrəndikdən sonra onunla danışdım. Çingiz Musayev söz verdi ki, araşdırıb mənə məlumat verəcək. Məlumat vermədi.

Ertəsi gün Çingiz Müsayevlə görüşmək üçün növbəti dəfə Konstitusiya Məhkəməsinə gəldim. Amma Anar Cəfərov mənə dedi ki, Çingiz Müsayev mənimlə görüşmək istəmir. Çingiz Musayevin iş telefonuna yenidən zəng vurmağa çalışdım. Alınmadı, telefon daimi məşğul idi. Yalnız bir həftədən sonra zəngim ünvanına çatdı: özünü kiçik məsləhətçi kimi təqdim edən Elxan adlı gənc cavab verdi. Onun sözlərinə görə, Çingiz Musayev omikrona yoluxub, xəstədir və artıq bir həftədir ki, işə gəlmir...

Əgər adi vətəndaşın pozulmuş konstitusiya hüquqlarının müdafiəsi üçün bütün imkanlar Konstitusiya Məhkəməsində hər cür yalan-doğru üsullarla bağlanırsa, o zaman bütün başqa dövlət orqanlarında vətəndaşlarla münasibətdə hansı sorğudan, hansı ədalətdən və məsuliyyətli münasibətdən söhbət gedə bilər?

...Ümid edirəm ki, şikayətimlə bağlı yaranmış anlaşılmazlıq ədalətli şəkildə aradan qaldırılacaq.

Mənim şəxsi məlumatlarım Konstitusiya Məhkəməsi Palatasının dəftərxanasında və yuxarıda qeyd olunan sənədlər Konstitusiya Məhkəməsinin İnternet saytındadır.

Adil Əliosmanov

Turan Agentliyi müraciətdə adı keçən digər şəxslərə də söz verməyə hazırdır.-0-