Azərbaycanın ağırlıqqaldırma üzrə altı idmançısı dopinqə görə diskvalifikasiya olunub

Beynəlxalq Ağır Atletika Federasiyasının (IWF) qərarı ilə ağırqaldırma üzrə beş idmançı 2023-cü, biri isə 2019-cu ilə qədər diskvalifikasiya edildikdən sonra dopinq qalmaqalı Azərbaycana gəlib çatıb.

İdmançılar ötən il Hyustonda dünya çempionatında dopinqdən istifadə etməkdə ifşa olunublar, xəbəri IWF yayıb. Elxan Əliquluzadə, Silviya Anqelova, Firudin Quliyev, Valentin Xristov, İntiqam Zairov 2023-cü ilə qədər, Dadaş Dadaşbəyli 2019-cu ilə qədər diskvalifikasiya olunub. Qeyd edək ki, Xristov 2012-ci il Olimpiya oyunlarının bürünc mükafatçısıdır.

Azərbaycanın Gənclər və İdman Nazirliyi baş verənlərə görə təqsirini etiraf etmək iqtidarında deyil və özünə bəraət qazandırmağa çalışır.

Nazirliyin bununla bağlı məlumatında deyilir ki, “Bütün lazimi işlərin aparılmasına baxmayaraq, əfsuslar olsun ki, bəzi hallarda diqqətsizlik nəticəsində içilən hansısa maye və ya yemək idmançının dopinqə düşməsinə səbəb ola bilər. 

Bu səbəbdən idmançıları çəkdikləri zəhmətin bəhrəsinin hədər getməməsi məqsədilə maksimum dərəcədə diqqətli olmağa çağırırıq. Biz baş verən bu hadisə ilə bağlı çox narahatıq və bu istiqamətdə lazımi tədbirlər görüləcək”.

Bununla belə, nazirlik Azərbaycan idmançılarının diskvalifikasiya olunması haqqında qərardan apellyasiya veriləcəyini istisna etməyib.

Xatırladaq ki, Ağır Atletika Federasiyasına “Azərbaycan Hava Yolları” QSC-nin sədri Cahangir Hacıyev rəhbərlik edir. -06D-