Şahbaz Xuduoğlu : Görünür, vərəqlərin arasında bomba təsiri bağışlayan nələrsə olub

“Qanun” Nəşriyyat Evinin direktoru Şahbaz Xuduoğlu Turan-a və Amerikanın Səsinə müsahibəsində nəşriyyat evində aparılan axtarışın səbəbləri və nəticəsindən danışıb.

Sual: “Qanun” Nəşriyyat Evində axtarış aparılıb. Hansı sənədlər, kitablar, nəşrə hazırlanan mətnlər götürülüb?

Cavab: Axtarış iyunun 12-də saat 1.30-da başlayıb, saat 5-dən sonra bitib. Bu prosesdə təqribən 10 nəfərə yaxın polis əməkdaşı iştirak edib. Bir də ki, orada bizim nümayəndələr olub. Yəni hər otqadan bir nümayəndə orada olub. Demək olar ki, çox diqqətlə axtarış aparılıb. Hər bir vərəqə, kitablara, hətta kitabların yerləşdiyi anbara baxılıb. Bütün bağlamalar açılıb. Əlyazmalarına, şəkillərə, onlara şübhəli gələ bilən hər yerə baxıblar. Bizim binada oturan başqa təşkilatların da otaqlarına baxıldı. Sonra mətbəəyə düşdülər. Sonradan axtarış aparanlar öz aralarında bölündülər. Çünki hamı bir yerdə bütöv bir binada axtarışı bitirə bilməzdi. Onların bir qrupu anbara endi. Oradan yarımfabrikant, müxtəlif vərəqlər, yarı çapdan çıxmış, yarı çıxmamış dəmir təbəqələr, rəngli kitab qapaqları və sair götürdülər. Təqribən 300-500 kiloqram arası materialları qablaşdırıb götürüblər. Bunlar içəri girmələri üçün hər-hansı sənəd təqdim etməyiblər. Axtarış nəyə görə aparıldı, bu, bəlli deyil. Onlar əsaslandırıblar ki, deyirlər ki, 102-yə (Daxili İşlər Nazirliyinin qaynar xətt xidməti – red.) məlumat daxil olub ki, bomba var və bomba axtarılır. Mən başa düşürəm ki, vərəqlərin arasında bomba gizlətmək mümkün deyil. Amma, görünür vərəqlərin arasında bunlara bomba təsiri bağışlayan nələrsə olub, götürüblər. Hələ ki, təhqiqat gedir. Təhqiqatın sonunda bəlli olacaq.  

Sual: Axtarış yazıçı Zümrüd Yağmurun “Ölkə adı 22” əsərinin təqdimatı ilə bağlı ola bilərmi? Çünki axtarışın keçirilməsi bu əsərin təqdimatından bir qədər sonraya təsadüf edir.

Cavab: Bu əsər bizdə nəşr olunmayıb. Bununla bağlı da heç bir məlumatım yoxdur.

Sual: Bəs, səbəbləri nədir?

Cavab: Səbəbini bilmirəm doğrusu. Mən ilk olaraq bu məlumatı alanda həqiqətən elə hesab etdim ki, binaya bomba qoyulub. Sonradan əlavə məlumat aldım ki, binada olan adamların bayıra çıxmasına mane olurlar. Onda başa düşdüm ki, əgər binada bomba qoyulsa adamları daha tez çıxarmalıdırlar, nəinki onların çıxışına mane olmalıdırlar. Onda başa düşdüm ki, bomba sadəcə bəhanədir. Ona görə də real səbəb nədən ibarətdir, hələ onu bilmirəm.

Sual: Amma, hesab edirsiniz ki, bu, siyasi deyil.

Cavab: Yox, mən inanmıram. Burada siyasi bir şey yoxdur. Yəni, siyasi o zaman olar ki, deyək ki, Cəmil Həsənlinin plakatlarının çap olunması bizim 150 min manat cərimələnməmizə səbəb oldu. Deyək ki, o zaman siyasi bir mövsüm idi. Seçkilər idi, o mövsümün nəticəsi idi. Amma, burada hər-hansı bir mövsüm yoxdur, siyasi nə ola bilər ki? Məncə burada siyasi yox, bəlkə xırda, hansısa bir səlahiyyətli məmurun xoşuna gəlməyən hər-hansı bir hərəkət olub. Onu bilmirəm.   

Sual: Biznes maraqları ola bilərmi?

Cavab: Bu barədə düşünmüşəm. Düşmən əli ola bilərmi? Düşmənim yoxdur. Rəqabət aparan nəşriyyatların işi ola bilərmi ki, zəng eləyib desinlər ki, “Qanun” nəşriyyatına bomba qoyulub. Amma bu qədər riskə getməzlər. Çünki indi həmin adamın şəxsiyyəti müəyyən olunur. Gec-tez onun şəxsiyyəti müəyyən olunmalıdır. O riskə də getmək olmaz. Başqa, adamın ağlına çox şeylər gəlir. Amma, çox şeyləri də deyə bilmirsən. Çünki həqiqət olmaya bilər.  

Sual: 2013-cü ilin oktyabrında prezident seçkilərindən sonra da vergi orqanıları “Qanun” Nəşriyyat Evində axtarş aparıb. Nəticələri nə oldu?

Cavab: Biz məhkəməyə müraciət etdik. Hələ də hesablarımız bağlıdır. Hələ də sənədlər bizə qaytarılmayıb. Yerli instansiya məhkəmələrini keçmişik. Artıq Avropa İnsan Hüquqları Məhkəməsinə müraciət etmişik. Avropa Məhkəməsində işə baxılmasını gözləyirik. Amma, dediyim kimi, biz şikayətlərimizi etməkdə davam edirik. Cərimə də öz qüvvəsində qalır. Hesablarımız bağlıdır. Hesabımıza kənardan köçürmə yolu ilə düşən pullar vergi qurumları tərəfindən dərhal müsadirə olunur. 

Sual: Hüquqlarınızın qorunması üçün hansı addımları atacaqsınız?

Cavab: Əlbəttə, hüquq müstəvisində. Biz indi vəkillərimizlə məsləhətləşirik. İki gün ki, bizim nəşriyyat  nəzarət altında olub, giriş-çıxış qadağan olunub. Mülkiyyət hüququmuz pozulub. Bunlarla bağlı məhkəməyə müraciət edəcəyik. Əgər yerli məhkəmələrdən xeyrimizə hər-hansı nəticə əldə edə biməsək, Avropa Məhkəməsinə müraciət edəcəyik. “Qanun” nəşriyyatı ölkənin bir nömrəli nəşriyyatıdır. Bu nəşriyyatın hüquqlarının belə kobud şəkildə pozulmasını rahat buraxa bilmərik. Biz onlarla nobelçilərin kitablarını buraxmışıq. 5 min addan çox kitabımız var. “Yapı Kredi” Türkiyə üçün nədirsə, “Qanun” Azərbaycan üçün odur, “Pinqvin” Avropa, Amerika üçün nədirsə, “Qanun” Azərbaycan üçün odur.   Nəşriyyatın bu şəkildə, bomba adı ilə iki gün pis vəziyyətə salınması bizə görə çox böyük, həm mənəvi kompensasiya tələb edən işdir. -0-