Azərbaycanın Moldovadakı səfirliyi qarşısında etiraz aksiyası

İyulun 23-də Azərbaycanın Kişinyovdakı səfirliyi qarşısında Hilal Məmmədova azadlıq tələbi ilə aksiya keçirilib. Aksiya Moldovanın “Qayd-Park” assosiasiyası tərəfindən təşkil edilib. Bu barədə Turana Sülh və Demokratiya İnstitutundan bildiriblər.

    SDİ direktoru Leyla Yunus Turana bildirib ki, o, Azərbaycanın digər ölkələrdəki səfirlikləri qarşısında da analoji aksiyalar keçiriləcəyinə ümid edir, baxmayaraq ki, hakimiyyət yenə bunu erməni lobbisinin və daxili “xalq düşmənlərinin” təxribatı adlandıracaq.

    Aksiyaya gəlincə, Qayd Park hüquq müdafiə assosiasiyasının bir qrup gənc nümayəndəsi səfirlik qarşısına toplaşaraq, beynəlxalq ictimaiyyətə Azərbaycanda bu insan hüquqlarının pozulması halına reaksiya vermək çağırışı ilə müraciət ediblər.

    Piketin qətnaməsində Hilal Məmmədovun sələfi Novruzəli Məmmədovun həbsxanada qətlə yetirildiyi xatırladılır. Hilal Məmmədovun təqib edilməsinin səbəblərinə gəlincə, Moldova hüquq müdafiəçiləri bunu Bakının Eurovision müsabiqəsinin keçirilməsinə milyonlar xərcləməsi ilə əlaqədar mətbuatda kəskin tənqiddən narahat olması ilə əlaqələndirir.

    Eyni zamanda, Hilal Məmmədovun Azərbaycan kəndində toyda demək olar ki pulsuz və heç bir səy göstərmədən hazırladığı video bir neçə həftə ərzində məşhurlaşıb və nüfuz qazanıb, Rusiya müxalifəti tərəfindən götürülərək, Putinə qarşı istifadə olunub. -02D-