Azərbaycanlı siyasi mühacirlər Almaniyadan deportasiya edildikdən sonra həbs olunan fəalların azadlığa buraxılmasını tələb ediblər

Bakı/01.10.22/Turan: Ötən gün  DAS (Demokratik Azərbaycanı Seç)  təşkilatının təşkilatçılığı ilə Almaniyanın Gissen şəhərində “Giessener Allgemeine” və Giessener Anzeiger” qəzetlərinin  ofislərinin önündə “Almaniyadan deportasiya edilərək Azərbaycanda həbs edilmiş Ziya İbrahimov və digər mühacir məhbusların azad olunması üçün həmrəy olaq!” adlı aksiya keçiririlib.

DAS təşkilatının məlumatına görə, təşkilatın fəalı Aynur Rzayeva bildirib ki, Azərbaycanda bu günədək jurnalistlər Rafiq Tağı, Elmar Hüseynov, Rasim Əliyev, Mehman Qələndərli mövqeyinə görə öldürülüb.

“Bundan başqa çoxsaylı jurnalist həbs edilib. Azərbaycanda jurnalistlərin şəxsi həyatları dəfələrlə provakasiya məqsədilə çəkilib ictimailəşdirilib. Azərbaycanda “Azadlıq radiosu”nun ofisi bağlanıb, müstəqil və müxalif mövqeli hər hansı qəzet nəşr edilmir. “Azadlıq”, "Meydan" TV, “Turan" TV və başqa mətbu orqanlarına giriş məhkəmə qərarıyla məhdudlaşdırılıb.  11 sentyabr 2022-ci ildə isə YouTube üzərindən yayımlanan “Xural "TV-nin rəhbəri Əvəz Zeynallı və vəkil Elçin Sadıqov saxlanılaraq barələrində cinayət işi açılıb”, - o qeyd edib.

Rzayeva hazırda Azərbaycanda120-dən artıq siyasi məhbusun olduğuna diqqət çəkib.

Digər fəalı Əbdülhüseyn Ələkbərov bildirib ki,  son dövrün aktual məsələlərindən biri də Almaniyadan Azərbaycana deportasiya edildikdən sonra orada həbs edilib işgəncələrə məruz qalan mühacirlərlə bağlıdır.

“Belə ki, sığınacaq istəkləri rədd edilən və bunun nəticəsində Azərbaycana deportasiya edilən Mütəllim Orucov, Malik Rzayev, Cəfər Mirzəyev, Pünhan Kərimli, Samir Aşurov və Ziya İbrahimova qarşı uydurma ittihamlar irəli sürülüb. Etirafedici ifadə almaq məqsədədilə onlara işgəncə verilib.  Pünhan Kərimli 6 il, Malik Rzayev isə 7 il  azadlıqdan məhrum edilib”, - o qeyd edib. 

Onun sözlərinə görə, Almaniyada humanitar əsaslarla sığınacaq almış və valideynlərinə baş çəkməyə gəlmiş Anar Əliyev də Azərbaycamda həbs edilib.

Hakimiyyət onun ailəsinin yenidən Almaniyaya dönüşünü qadağan edib  və nəticədə 2 uşağı təhsildən kənarda qalıb.

Təşkilatın fəalı Oqtay Allahverdiyev bildirib ki, daha bir siyasi fəal, bloger  Rəşad Ramazanov 2022-ci ildə Gürcüstandan Azərbaycana dönüb və bir müddətdən sonra  həbs edilib.

Ziya İbrahimov Azərbaycana deportasiya edilən gün aeroportdan birbaşa polisə təhvil verilib. Bir aylıq inzibati həbsdən sonra onun barəsində məhkəmə qərarını icra etməmək iddiası ilə cinayət işi açılıb.

Aksiya iştirakçıları Almaniya hakimiyyətini Azərbaycan hökumətindən readmissiya sazişinin şərtlərinə əməl etməyi, yuxarıda adı çəkilən şəxsləri və digər siyasi məhbusları azad etməyi tələb etməyə, həmçinin ikitərəfli siyasi dialoqda insan hüquqlarına hörmət edilməsini tələb etməyə çağırıblar.06B