Baba Pünhan yad edilib

Azərbaycanın çağdaş dövr görkəmli şairlərindən Baba Pünhanın (Atababa Seyidəli oğlu Mədətzadə) vəfatından 10 il ötür.

Bu tarixlə əlaqədar “Babasevərlər” cüməaxşamı Baba Pünhanın Kürdəxanıda məzarı ətrafında  toplanıblar.

B.Pünhanın dostu, xalçaçı-rəssam Eldar Mikayılzadə onun barəsində düşüncələrini açıqlayıb. O, B.Pünhanı ləyaqətli insan, sədaqətli dost, misilsiz istedad sahibi kimi xarakterizə edib.

B.Pünhanın ədəbi yaradıcılığını E.Mikayılzadə “çağdaş dövr Azərbaycan ədəbiyyatının görkəmli səhifələrindən biri” adlandırıb. Bu poeziyanın gerçəkləri  insanlara ən sadə və yadda qalan şəkildə anlatdığı qeyd olunub. B.Pünhan ədəbi yaradıcılığı “çağdaş dövrün həqiqətlərinin əksi” kimi dəyərləndirilib.

Şairin gerçək həyatın bütün tərəflərindəki neqativləri amansızcasına qamçılması vurğulanıb. Onun təhsil, səhiyyə, elm sahəsindəki neqativlərə münasibətilərini şerlərində açıqlaması qeyd edilib.

Eyni zamanda, E.Mikayılzadə B.Pünhanla dostluğu haqda danışaraq, onu “maraqlı dost, maraqlı insan” adlandırıb. “Hər şey bir yana, Baba sədaqətli dost idi”, deyə E.Mikayılzadə bu bir cümlə ilə B.Pünhanın insani kimliyinə dəyər verib.

O, B.Pünhanı “yeri həmişə görünəcək şəxs” kimi şərh edib və bu yaradıcılığın hələ uzun zaman Azərbaycan insanına yarayacağını bildirib.

“Babasevər”lər B.Pünhanın məzarı üzərinə tər qərənfil dəstələri düzüblər, ruhuna dualar oxuyublar.

B.Pünhan 1948-ci ildə anadan olub, 2004-cü il aprelin 17-də keçirdiyi əməliyyatdan sonra qəfil qalxan qan təzyiqi nəticəsində dünyasını dəyişib. Kürdəxanı qəbirstanlığında dəfn edilib. B.Pünhanın məzarı üzərində dostu E.Mikayılzadənin eskizləri əsasında qəbirüstü türbə, abidə ucaldılıb. -05C-