Bakı İstintaq təcridxanasında kriminal mübahisə

Kürdəxanıda yerləşən 1 saylı Bakı İstintaq Təcridxanasında bazar günü ağır cinayətlər törətməkdə ittiham olunan iki məhbus arasında dava olub. Hadisə bıçaqlaşma ilə başa çatıb. 

Məlumatlı mənbələrdən daxil olan məlumatlara görə, münaqişə nüfuzlu kriminal qruplar arasında mübahisə zəminində baş verib. Birinci qrupa həbs cəzası çəkən “Lotu Qulu” ləqəbli Müşfiq Səlifov, ikinci qrupa isə azadlıqda olan, kriminal aləmdə Rövşən Lənkəranski kimi tanınan Rövşən Canıyev rəhbərlik edir.

Münaqişənin əsasında “Lotu Qulu”nun bir neçə il əvvəl digər kriminal avtoritetlə (hazırda dünyasını dəyişmiş Hikmət Muxtarov – Hikmət Sabirabadski ilə) insidentdən sonra mərhum olduğu nüfuzunu bərpa etmək cəhdi durur.

Mənbələrin məlumatına görə, Rövşən Lənkəranski “Lotu Qulu”nun nüfuzunun bərpasına fəal şəkildə mane olur.

Bazar günü baş verən hadisəyə gəlincə, onu məhbuslardan biri – Emin Məmmədov təşviq etmiş ola bilər. Məqsəd onun hamisi olan “Lotu Qulu”nun nüfuzunu artırmaq ola bilər.

Dava qəribə şəkildə İstintaq Təcridxanasının həyətində baş verib, Məmmədov “təsadüfən” Tural adlı digər məhbusu görüb. Əvvəlcə Məmmədov Turalı vurub, sonra onun üzərinə atılıb və döş qəfəsinə və ombasına bıçaq xəsarətləri yetirib. Bu zaman cəzaçəkmə müəssisəsinin əməkdaşı dalaşanları ayırarkən əlindən bıçaq yarası alıb.

Lakin Penitensiar Xidmətdən Kürdəxanı İstintaq Təcridxanasında bıçaqlaşma haqqında məlumatı təkzib ediblər. Qurumun ictimaiyyətlə əlaqələr şöbəsindən Turan-ın müxbirinin sözügedən məlumatla bağlı şərh vermək xahişinə cavabda bildiriblər ki, “belə bir hadisə olmayıb”.

Yuxarıda adı çəkilən hər iki məhbus ağır cinayətlərdə ittiham olunur. Tural ötən il Bakıda YDS-də kriminal mübahisə zamanı qətldə təqsirli bilinir. Məmmədov da qətl törətməkdə, zorla pul tələb etməkdə və s. ittiham olunur.

Maraqlıdır ki, Məmmədov 2005-ci ildə “Qurd qapısı” yaxınlığında odlu silahdan istifadə ilə kriminal münaqişə faktı üzrə cinayət işində fiqurant olub.

Münaqişənin bir çox iştirakçılarının cinayət məsuliyyətinə cəlb edilməsinə baxmayaraq, Məmmədov gizlənməyə müvəffəq olub. Lakin bu ilin avqust ayında gözlənilmədən istintaqa təslim olunub  və hazırda Ağır Cinayətlərə dair İşlər üzrə Bakı Məhkəməsində onun işinə baxılır.

Qeyd edək ki, bir ay əvvəl Səlifovun vəkilləri mətbuat konfransı keçiriblər və 8 saylı cəzaçəkmə müəssisəsinə baş çəkdikləri zaman hüquqlarının pozulmasından şikayət ediblər. Vəkillər həmçinin bildiriblər ki, müvəkkillərinin doğma qızı onun yanına buraxılmır.

Xatırladaq ki, Səlifov həm də vaxtilə nüfuzlu şəxslərin sifarişini yerinə yetirərək, jurnalist Elmar Hüseynovun qətlinə görə məsuliyyəti öz üzərinə götürməkdən imtina etməsi ilə məşhurdur. Bundan sonra həbsdə olan Səlifov rəfiqəsini zorlamaqda ittiham edilib və yeni müddətə həbs edilib. -06D-