İctimai Palata keçmiş rektorun videolarını hakimiyyəti ifşa kimi dəyərləndirdi

İctimai Palata keçmiş rektor Elşad Abdullayevin yaydığı videolar və 2012-ci ilin yekunlarına dair çərşənbə axşamı Müsavat Partiyası ofisində dinləmələr keçirib.

Müsavat Partiyası başqanı İsa Qəmbər 2013-cü il prezident seçklərini nəzərdə tutaraq, “cəmiyyətin önəmli ilə daxil olduğunu” qeyd edib. 2012-ci ilin önəmli hadisələri kimi 1 mart Quba üsyanının, “Eurovision” müsiqi müsabiqəsinin, E.Abdullayevin yaydığı videoların, İctimai Palatanın aksiyalarının adları çəkilib. 

Quba üsyanı xalqın rejimə etiraza hazır olması, E.Abdullayevin yaydığı videoların hakimiyyəti dağınıq hala salması, İctimai Palatanın aksiyaları cəmiyyətin güclənməsi göstəricisi kimi dəyərləndirilib. E.Abdullayevin yaydığı videolar ölkədə rüşvət və korrupsiyanın hansı səviyyədə olmasının və bütün hakimiyyəti əhatə etməsinin əyani sübutu kimi dəyərləndirilib. Bu videolar ölkədə mühüm dövlət qurumlarının qanunsuz addımlardan kənarda qalmadığını göstərib. Müsavat lideri bu hadisələrin həm də 2013-cü il üçün fəaliyyət istiqamətlərini müəyyən etdiyini nəzərə çatdırıb. “Bu videolar konkret hakimiyyətin ifşasıdır”, - deyə Müsavat başaqanı mövqeyini ifadə edib. Təkcə bu videoların mövcud hakimiyyətə “dur” deməyə ciddi əsas verdiyi qeyd edilib. 

“Bu videolar ölkədə hakimiyyət qollarının ciddi böhranla üz-üzə qalmasıdır”, - deyə Koordinasiya Şurasının üzvü Pənah Hüseyn bu videolara dəyər verib. Bu videoların nəticəsinin hələ bundan sonra da özünü göstərəcəyini söyləyib. Bu videolarda adları keçən hakimiyyətin məşhur isimlərinin rüşvət faktını təkzib etmələrinin inandırıcı görünmədiyi nəzərə çatdırılıb. “Bu videolarda DİN-in, MTN-in adları keçir, sonra daha nələr üzə çıxacaq, Allah bilir”, deyə P.Hüseyn bu ifşanın davam edəcəyini deyib. P.Hüseyn 2012-ci ilin daha bir önəmli hadisəsi kimi dekabrın 19-da İctimai palatanın seçkidə iştirakla bağlı qəbul etdiyi qərarın adını çəkib. “Bu təkcə seçkidə iştirakla bağlı qərar deyildi, həm də İctimai Palatanın özü haqda qəbulı etdiyi qərar idi”, - deyə qərarın əhəmiyyətini anladıb. 

2012-ci il iqtidarın E.Abdullayevin videoları ilə daxildən, beynəlxalq qururmların açıqlamaları ilə xaricdən durmadan ifşası ili sayılıb. İqtidarın biabırçı “kürü diplomatiyası”nın biabırçı sonluğa gəlməsi vurğulanıb. 2013-cü ilin ciddi sınaq, ciddi dəyişikliklər ili olacağı kimi proqnozlaşdırılıb. “20 illik Azərbaycan iqtidarı ciddi böhranla üzləşib, ağır durumdadır”, - deyə “Azadlıq” qəzetinin redaktoru Rahim Hacıyev videolara münasibətini ifadə edib. Hakimiyyətin bu videolara necə münasibət sərgiləmək üçün iradəsi olmadığı deyilib. Həm də E.Abdullayevin vidolarda əks etdirdiyi məsələlərə Avropa Birliyi səviyyəsində reaksiya olması gözlənilir. Son iki həftə ərzində keçmiş rektorun yaydığı materialların oxunuş sayının 300 min nəfəri keçdiyi deyilib. Sənədlər yayıldıqdan bu yana isə onların oxucu sayının 1 milyon nəfəri ötdüyü ifadə olunub. “Cəmiyyətdə seyrcilik var, amma baş verən hadisələrə adekvat reaksiya yoxdur, cəmiyyəti belə reaksiyalara hazırlamaq lazımdır”, - deyə R.Hacıyev qeyd edib. 

Xalq Cəbhəsi Partiyasının sədri Əli Kərimli yayılan videoların məzmununu dövlət adına idarəetmə sisteminin böhranı kimi dəyərləndirib. Bu ifşaları hakimiyyətin “klanlararası mübarizə” kimi təqdim etməyə çalışması “iz azdırmaq” adlandırılıb. Bu məəslə ilə bağlı iqtidarın yaratdığı müstəqil istintaq komissiyası əslində E.Avbdullayevi qorxutmaq mexanizminə döndüyü vurğulanıb. İqtidarın onu Fransadan ekstradisiya etmək üçün səy göstərdiyi nəzərə çatdırılır. Bu rejimin artıq dövləti gözdən salmasına yol verməyin mümkünsüzlüyünə diqqət çəkilib. 

Bu qədər cinayətlər edən rejimi demokratik seçkiyə vadar etməyin yolunun xalq basqısından keçdiyi xatırladılıb. “2012-ci il iki tendensiya hakimiyyətin durmadan ifşası və müxalifət sıralarına yeni-yeni qüvvələrin qoşulması ilə müşahidə olunub”, deyə AXCP sədri bitməkdə olan ilə münasibət bildirib. -05C-