Bakı metrosunda tüstülənməyə elektrik naqillərində qısa qapanma səbəb olub

Çərşənbə günü axşam Bakı metrosunda tüstülənmə baş verib. Bununla əlaqədar qısa müddət üçün qatarların hərəkəti dayandırılıb. Bir neçə sərnişin özünü pis hiss edib, onlara yerindəcə tibbi yardım göstərilib.

Tüstülənmə saat 20.00 (19.00) radələrində "28 May" stansiyasında başlayıb. Tüstü iyi "Gənclik" stansiyası tərəfdən tuneldən yayılmağa başlayıb. Sərnişinlərin bir hissəsi tələsik stansiyanı tərk etməyə başlayıb. Stansiyaya giriş bağlanıb.

FHN-in məlumatına görə, hadisə yerinə Dövlət Yanğından Mühafizə Xidmətinin yanğınsöndürənləri göndərilib. Görülmüş operativ tədbirlər nəticəsində saat 20:30-da tüstü mənbəyi aradan qaldırılıb.

Öz növbəsində, "Bakı Metropoliteni" QSC-dən Turan-a bildiriblər ki, tüstülənmə saat 20.00 radələrində "28 May" və "Gənclik" stansiyaları arasında baş verib. Qısa müddət üçün qatarların hərəkəti dayandırılıb. Metropoliten mütəxəssisləri müəyyən ediblər ki, elektrik naqillərində qısa qapanma nəticəsində isinmə baş verib. Bu səbəbdən naqillərin izolyasiya hissəsi əriyib, bu da tüstülənməyə səbəb olub.

Hadisə barədə FHN xidmətlərinə və "təcili yardım" stansiyasına məlumat verilib.

Sərnişinlərin sağlamlığı üçün təhlükə yaranmayıb. Amma bir neçə nəfər özünü pis hiss edib, onlara yerindəcə tibbi yardım göstərilib. Hazırda metropoliten normal rejimdə işləyir.  –06D--