Bakıda qəzet köşkləri kriminal şəbəkəyə çevrilir

Sentyabrın 29-da bir sıra KİV-lərin və Reportyorların Azadlıq və Təhlükəsizlik İnstitutunun nümayəndələri paytaxtda qəzet köşklərinin sayca beşinci monitorinqini keçiriblər.

Demək olar ki, bütün köşklər üçün qəzet satışına marağın olamması səciyyəvi olub.

Qəzetlər əvvəlki kimi köşklərə formal olaraq, tələbat nəzərə alınmadan verilir. Köşk satıcılarından biri bildirib ki, bir neçə dəfə tələbat olan qəzetləri sifariş ediblər, amma cavab gəlməyib. “Bizə qəzetləri soruşmadan – hər nəşrdən iki-üç nüsxə verirlər”, deyə satıcı bildirib.

Bundan başqa, əvvəlki kimi, “Azadlıq”, “Yeni Müsavat”, “Zerkalo” qəzetləri vitrinə qoyulmur. Niyə? – sualına cavabda köşk satıcıları ağlabatan izahat verə bilmir.

Əvvəlki monitorinqlərdə olduğu kimi, köşk satıcıları qəzetləri hansı firmanın gətirdiyi sualına cavab verə bilməyiblər. Rekvizitsiz, möhürsüz adi kağız olan fakturalarda mal göndərənin adı göstərilməyib.

Ərzaq məhsulları və siqaretlər də bu şəkildə satılır. Sahil parkında monitorinq qrupunun gözü qarşısında siqaret gətirdilər. Köşk satıcısı bildirdi ki, malı sahiblərinin göstərişi ilə tanımadığı insanlardan alır. O, bu sahiblərin kim olduğunu da söyləyə bilməyib. 

5 monitorinqin nəticələri Bakıda şəhər icra hakimi Hacıbala Abutalıbovun hamiliyi ilə köşklərdən cinayətkar ticarət şəbəkəsi qurulur. Malların hərəkəti və satışdan əldə edilmiş vəsait rəsmiləşdirilmir, hakim “Yeni Azərbaycan” partiyasının ofislərinin, Vergilər Nazirliyinin, Hesablama Palatasının və digər dövlət nəzarəti orqanlarının yanında sistem yarıleqal rejimdə işləyir. 

Bir müddət əvvəl maraqlı KİV və jurnalist təşkilatlarının nümayəndələri bu məsələni həll etmək və köşklərin işlərini tənzimləmək üçün Bakı meri ilə görüşməyə çalışıblar. Amma Abutalıbov görüşdən qaçır, yazılı sorğulara cavab verməkdən də imtina edir. Bununla əlaqədar olaraq, merdən məhkəmə qaydasında cavab almaq qərara alınıb. -0-