Balakən zəlzələsi ilə bağlı son məlumatlar

 Dünən baş vermiş zəlzələ nəticəsində  Balakən rayonu ərazisində çoxsaylı evlərdə dağıntılar qeydə alınıb. 

Turan-ın bölgə müxbiri zəlzələnin təsirindən ziyan çəkmiş əsas yaşayış məskənlərində olub. Onun müşahidələrinə  görə, hər 10 evdən 3-4-də dağıntı və çatlar var. 

“Böyük miqyaslı uçqunlar olmasa da çoxsaylı evlərin dam örtüyü çöküb,  çatlar əmələ gəlib. Qabaqçöl qəsəbəsi (beş kəndi birləşdirir), Talalar, Xalatala, Cebrovtala, Poştbinə kəndlərində yüzlərlə ev ziyan çəkib. Xalatla kəndində 2 nəfər xəsarət alıb. Bir nəfə  isə ürək tutmasından dünyasını dəyişib”, - zəlzələ bölgəsindən Turan-ın müxbiri bildirib.   

Hazırda Fövqəladə Hallar Nazirliyi və yerli hakimiyyət orqanları əhaliyə çadırlar paylayır, zədələnmiş evlərin sayımı müəyyənləşdirir. 

Zəlzələ hətta Balakən rayon mərkəzində də ziyanlara səbəb olub. “Adamlar nə edəcəyini bilmir. Dünən gün ərzində bir neçə dəfə zəlzələ olub. Yer titrəyəndə evdən qaçmaqla canımızı qurtarırıq. Sığınacaq yaradılmayıb. Əhalinin nə edəcəyi barədə məlumat verilmir”, - rayon sakinlərindən biri Turan-ın müxbirinə bildirib. 

Digər sakin isə deyib ki, çoxsaylı evlərdə çat əmələ gəldiyindən  yerli hakimiyyət orqanları əhaliyə kömək etmək gücündə deyil: “Mənim evimdə, hamamımda çatlar yaranıb. Hələ ki, gəlib baxan olmayıb. Evimdə yaşamaq hər an təhlükədir, sığınacaq üçün isə yer yoxdur”. -03B-     

Zaqatalada və digər rayonlarda zəlzələ olub, dağıntılar var.

Oktyabrın 14-ü saat 16:00 radələrində Zaqataladan 28 km qərbdə Balakən rayonu ilə Gürcüstan sərhəddində zəlzələ qeydə alınıb. Dağıntı və insan təlafatı barədə hələlik məlumat verilmir.

Oktyabrın 13-ü isə saat 23:00 radələrində Şəki, Zaqatala, Balakən bölgələrində 4 bal gücündə zəlzələ qeydə alınıb. Şəhər və ətraf kəndlərdə tikililərdə iri çatlar əmələ gəlib, bəzi yerlərdə dağıntılar da var. 

Dağıntılar əsasən Qabaqçöl kəndində baş verib. Rayon mərkəzinin binalarında çatlar var. İnsanlar evlərinə girməyə qorxurlar.

Qeyd edək ki, bu zonada bu növbəti güclu zəlzələdir. Bir necə gün əvvəl Şamaxı və İsmayıllıda 5 bal təkanlar olmuşdur. Bu ilin yazında isə Zaqatalada 6 bal zəlzələ yüzlərlə evi zədələmişdir.