Baş prokuror Gəncə hadisələri, deputat mandatı və Fuad Qəhrəmanlı ilə bağlı açıqlama verib

Bakı/01.10.19/Turan: Gəncə şəhərinin sabiq icra başçısına qarşı törədilən terror aktı, həmin terror aktını dəstəkləyən, kütləvi iğtişaşlar törətmək istəyənlər dini-radikal qüvvələrdir. Bu barədə bu gün Azərbaycanın baş prokuroru Zakir Qaralov jurnalistlərin sualının cavabında bildirib.

Onun sözlərinə gösə. Gəncədə baş verən hadisələrlə bağlı prokurorluq istintaq aparıb və kifayət qədər sübut əldə edib. "Məhkəmə prosesi yekunlaşdığına görə qeyd edə bilərəm ki, onların cinayətləri tam sübuta yetirilib. Məhkəmə, sözsüz ki, hər bir təqsirləndirilən şəxsin şəxsiyyətini, ailə vəziyyətini, bundan əvvəlki fəaliyyətini nəzərə alaraq qərar qəbul edir. Qəbul edilmiş humanist qərarlar onların günahsız olması demək deyil", deyə Qaralov qeyd edib.

2018-ci il iyulun 3-də Gəncədə şəhərin icra hakimiyyəti başçısı Elmar Vəliyevə qarşı sui-qəsd törədilib. Gəncə sakini Yunis Səfərov onu və cangüdənini yaralayıb. Bundan sonra sosial şəbəkələrdə iyulun 10-da Gəncə şəhər icra hakimiyyətinin binası qarşısında Vəliyevə qarşı etiraz aksiyası təyin edilib.

Elə həmin gün Daxili İşlər Nazirliyi Gəncədə iğtişaşlar baş verdiyi, iki yüksək rütbəli polis əməkdaşının qətlə yetirildiyi barədə məlumat yayıb. Daha sonra dindarlar və digər şəxslər arasında kütləvi həbslər aparılıb.

2019-cu il iyulun 31-də baş prokuror Zakir Qaralov Elmar Vəliyevə sui-qəsdlə bağlı mütəşəkkil cinayətkar qrupun 29 üzvünün cinayət məsuliyyətinə cəlb edildiyini, 11 nəfər barəsində beynəlxalq axtarış elan edildiyini bildirib. 10 iyul hadisələri ilə bağlı 60 nəfər barəsində 8 cinayət işi üzrə istintaq yekunlaşdırılıb və işlər məhkəmələrə göndərilib.

Təqsirləndirilən şəxslər müxtəlif müddətli həbs cəzalarına məhkum edilib. Sonradan apellyasiya məhkəməsi işin 10 fiqurantını həbsdən azad edib, çoxsaylı insanın həbs müddətini azaldıb.

Baş prokuror deputat mandatından imtina edən Rafael Cəbrayılovla bağlı sualın vabaında deyib ki, Mərkəzi Seçki Komissiyası fəaliyyətinə xitam verdikdən sonra onunla bağlı məsələ müzakirə olunacaq.

"Onun aldığı borcla bağlı vətəndaşlar məhkəmələrə müraciətlər ediblər. Hazırda iddia ərizəsinə mülki qaydada baxılır. Məhkəmədə dələduzluq və digər cinayətləri müəyyən edilsə, barəsində xüsusi qərardad çıxarılıb, prokurorluğa göndəriləcək. Daha sonra Baş Prokurorluqda araşdırma aparılacaq", deyə o deyib.

Sentyabrın 30-da Milli Məclisin plenar iclasında Rafael Cəbrayılovun mandatından imtina etməsi ilə bağlı müraciəti parlamentə təqdim edilib.

Sosial şəbəkələrdə deputat Cəbrayılovun 300 min dollar borc qarşılığında deputat vəsiqəsini girov qoyması ilə bağlı səs yazısı yayılıb. Bu, geniş tənqidlərə yol açıb.

Deputat Təranə Fətəliyeva adlı şəxsdən ev tikmək üçün notariat qaydasında 300 min ABŞ dolları məbləğində borc alıb. Borcu vaxtında ödəyə bilmədiyi üçün zəmanət kimi deputat vəsiqəsini girov qoyub. Bundan başqa, Cəbrayılovun Xatirə Nəcəfova adlı daha bir qadından da borc aldığı bildirilir.

AXCP sədrinin keçmiş müavini Fuad Qəhrəmanlının ailə üzvlərinə qarşı fiziki təzyiq etməsi ilə bağlı sualın cavabında Qaralov bildirib ki, Qəhrəmanlı barəsində QHT-lərin müraciəti Baş Prokurorluqda baxılma ərəfəsindədir.

"Qadın və uşaq hüquqlarını müdafiə edən qeyri-hökumət təşkilatları Fuad Qəhrəmanlının öz ailə üzvlərinə qarşı törətdiyi iztirablar, işgəncələr, ağır xəsarətlər yetirməsi ilə bağlı Baş Prokurorluğa müraciət edib. Həmin müraciət hazırda Baş Prokurorluqda baxılma ərəfəsindədir. İlk növbədə zərərçəkənlərin rəsmi mövqeyini öyrənməliyik. Həm həyat yoldaşının, həm də azyaşlı qızının rəsmi mövqeyini öyrənəndən sonra qanun çərçivəsində qərar qəbul olunacaq".

Baş prokuror deyib ki, özünü müxalifət adlandıran vətəndaşların hüquqlarının müdafiəsi üzrə özlərini daim cəmiyyətə təqdim edən şəxslər öz ailələrində bu cür qanunsuz və vəhşi hərəkətlər etdiklərinə görə cəza almalıdırlar.

"Bizdə olan məlumata görə, həmin partiyanın rəhbərinin də bundan xəbəri olub. Təəssüflər olsun ki, onlar da vaxtında bir tədbir görməyiblər və heç bir məlumat verməyiblər", deyə Qaralov qeyd edib.

Bu günlərdə Fuad Qəhrəmanlının qızı atasının anasını və qızlarını fiziki təzyiqlərə məruz qoyması ilə bağlı bəyanatla çıxış edib. Onun bəyanatından belə aydın olur ki, hadisə bir neçə il əvvələ təsadüf edir. Qızının bəyanatından sonra Fuad Qəhrəmanlı AXCP sədrinin müavini vəzifəsindən istefa verib. -03D-