Bayram Məmmədovun məhkəməsində

Bu gün Bakı Apellyasiya Məhkəməsində NİDA-çı məhbus Bayram Məmmədovun apellyasiya şikayəti üzrə ilkin baxış olub.

Vəkil Elçin Sadıqov həbs qətimkan tədbirinin dəiyşdirilməsi, girov qətimkan tədbirilə əvəzlənməsi, ev dustaqlığına buraxılması, B.Məmmədova bəraət verilməsi, məhkəmənin qismən istintaqla aparılması barədə vəsatətlər qaldırıb.

Bununla yanaşı vəkil 1-61-ci səhifələri cinayət içindən çıxarmaq barədə vəsatət qaldırıb: “Belə ki, həmin səhifələrdə mənim vəkil olaraq imzam yoxdur və prosesdə iştirakıma şərait yaradılımayıb, ona görə də onlar sübut kimi qəbul edilə bilməz”.

Vəkil B.Məmmədov saxlanılan zaman orada iştirak edən bir neçə şəxsin dindirilməsini vacib sayaraq həmin şəxslərin, o cümlədən  Baş Narkotiklərə Qarşı Mübarizə İdarəsi rəisinin dindirilməsi barədə vəsatət qaldırıb.

Bundan əlavə, vəkil narkotik maddələrin qoyulduğu sellafon torbaların barmaq izlərinin götürülməsi və tutuşdurulması üçün gətirilməsi barədə vəsatəti qaldırıb: “Bundan sonra isə həmin narkotik maddələr məhv edilməlidir ki, yeni həbslərdə istifadə olunmasın”.

Amma dövlət ittihamçısı çıxış edərək vəsatətlərin qəbul olunmamasını xahiş edib. Hakim Həsən Əhmədov da vəsatətləri təmin etməyib.

Məhkəmə baxışı 2017-ci il fevralın 3-ü saat 11:00-a təyin edilib.

Xatırladaq ki, B.Məmmədov 2016-cı il mayın 10-da həbs edilib. Daxili İşlər Nazirliyi B.Məmmədovun yaşadığı mənzildən bir kiloqramdan çox heroin aşkarlandığı barədə məlumat yayıb.

B.Məmmədov isə məhkəmə prosesində narkotik maddə ittihamını rədd edərək heykəlin üzərinə şüar yazdığına görə saxlandığını bildirib. Bakl Ağır Cinayətlər Məhkəməsi B.Məmmədovun 10 il azadlıqdan məhrum olunması barədə qərar çıxarıb.-05B-