Bayramlı: "Həbsim hakimiyyətin qisasıdır"

Bakı/05.01.17/Turan: Xalq Cəbhəsi Partiyasının sədr müavini Gözəl Bayramlının işi üzrə məhkəmə prosesində yanvarın 4-də şahid ifadələri başa çatıb, bundan sonra təqsirləndirilən şəxs özü çıxış edib. Bayramlı bildirib ki, onun həbsi əvvəlcədən planlaşdırılıb, bu əməliyyatda Dövlət Sərhəd Xidmətinin əməkdaşları ilə yanaşı, xüsusi xidmətlər də iştirak ediblər. Həbsin özü isə ölkənin siyasi rəhbərliyi ilə razılaşdırılıb.

Həbs çoxdan hazırlanırdı, deyən Bayramlı xatırladıb ki, hələ 2016-cı ilin oktyabrında onu DİN-in Mütəşəkkil Cinayətkarlığa qarşı Mübarizə Baş İdarəsinə çağırıblar və "dövlət əleyhinə cinayətlərə" son qoymasa həbs ediləcəyi barədə xəbərdarlıq edilib.

Bayramlının sözlərinə görə, onu 2015-ci il Nardaran hadisələri ilə bağlı həbs edilmiş siyasi məhbusların müdafiəsinə görə həbslə hədələyirdilər.

Bundan sonra Bayramlıya açıq nömrədən telefon təhdidləri gəlməyə başlayıb. O, hüquq-mühafizə orqanlarına müraciət edib, amma iş araşdırılmayıb.

Bayramlı qeyd edib ki, hakimiyyətin ona qarşı münasibəti hələ 2010-cu ilin parlament seçkilərindən sonra sərtləşib. Həmin seçkilərdə deputatlığa namizəd olan Bayramlı teledebatlarda hakim Yeni Azərbaycan Partiyasının icra katibi Əli Əhmədova qarşı çıxış edərək, onun hökumətini yalanda ittiham edib. Buna görə o, öz həbsini "hakimiyyətin qisası" hesab edir.

Sonuncu dəfə mayda Gürcüstana səfərindən əvvəl hakimiyyətyönlü KİV onun guya jurnalist Əfqan Muxtarlı və digər şəxslərlə birlikdə Gürcüstanda beynəlxalq təşkilatların nümayəndələri ilə görüşdüyü və müxalifətin maliyyələşdirilməsi üçün pul aldığı haqqında yalan məqalələr dərc edirdilər. O, həmçinin bildiri ki, sonuncu səfəri zamanı o, izləndiyini hiss edib.

Mayın 25-də Gürcüstandan qayıdarkən paspor yoxlanışı zamanı onu saxlayıblar və "sistemdə problem olduğunu" bildirərək, gözləməyə məcbur ediblər. Daha sonra "sistemin işlədiyini" deyiblər və yoxlamadan keçməyə dəvət ediblər, yoxlama zamanı birdən "pasportla bağlı problem aşkarlanıb" və onu rəisin kabinetinə aparıblar.

Onu dar, qaranlıq dəhlizdən aparıblar və kimsə əlindən tutub deyib: "Mən sizə kömək edəcəyəm" və həmin an Bayramlı bu şəxsinonun baqajına nə isə qoyduğunu hiss edib. Bundan sonra o, birdən-birə deyib ki, qayıdıb gömrük nəzarətindən keçmək lazımdır. Həmin an o, Əli Kərimliyə (AXCP lideri) zəng edib çantasına nə isə qoyulduğunu deməyə müvəffəq olub. "Əşyalarımı yoxlamadan keçirərkən gömrük əməkdaşı Alidə Əzizova deyib ki, orada "12 min dollar" var. Ona sual etdim ki, saymadan pulun məbləğini haradan bilir?", deyə Bayramlı bildirib.

O, həmçinin qeyd edib ki, onun işi baş prokuror Zakir Qaralovun və onun birinci müavini Rüstəm Usubovun şəxsi nəzarəti altında idi.

Prokurorluq rəhbərliyi belə qanunçuluğun qeydinə qalırdısa, niyə ölkənin neft sərvətlərinin talan edilməsinə, ölkədən milyardların offşor zonalara çıxarılmasına nəzarət etmir?

Daha sonra Bayramlı zalda olan fəallara üz tutaraq deyib ki, o, maksimum cəza çəkməyə hazırdır, amma heç bir cəza onu siyasi mübarizədən çəkindirməyəcək.

Növbəti iclas yanvarın 10-na təyin edilib.

* Bayramlı mayın 25-də Gürcüstandan qayıdarkən sərhəd məntəqəsində saxlanılıb. Onun barəsində CM-in 206.1-ci (qaçaqmalçılıq) maddəsi ilə cinayət işi açılıb və məhkəmə onu həbs edib.

İstintaqın məlumatına görə, Bayramlının baqajına baxış zamanı guya onun bəyan etmədiyi 12 min dollar tapılıb.

Bayramlı bildirib ki, pulu onun əşyalarının arasına başqası qoyub, həbsi isə siyasi sifariş xarakterlidir. O, həmçinin bildirib ki, Gürcüstana müalicə üçün gedib və son iki ildə üç dəfə orada əməliyyat olunub. -06D-