Birlik rəhbəri müdafiə nazirindən şikayət etdi

“Ehtiyatda və İstefada olan Zabitlər” ictimai birlyinin rəhbəri Yaşar Cəfərli Silahlı qüvvələrdəki neqativlərlə bağlı baş prokuror və Milli Təhlükəsizlik nazirinə müraciət ünvanlayıb.

İlbəil hərbi büdcənin artırılmasına baxmayaraq bu faktın adı çəkilən sahədə neqativ atmosferə təsir edə bilməməsi vurğulanır. Səbəb kimi isə orduda islahatlar aparılmaması göstərilir. Ordudakı mövcud sitemin minlərlə zabit və giziri cinayətkara çevrdiyi iddia edilir. 10-20 il xidmət keçən hətta yüksək rütbəli zabitlər bu dözülməz durumdan canlarını qurtara bilmək üçün “xidməti uyğunsuzluq” maddəsilə belə tərxis olunmağa can atırlar. Son 18 ildə belə tərxis olunan zabit və gizirlərin sayına görə “bütün dünya ordularının rekordlarını ötdüyü” nəzərə çatdırılır.   

15 il hərbi xidmət keçən hərbçilərin daimi yaşayış sahəsilə təmin olunması qanunla nəzərdə tutulsa da bu təbəqənin böyük qisminin hələ də evsiz qaldıqları ifadə edilir. 

19 ildir ki, müdafiə naziri olan Səfər Əbiyev orduda sovet təfəkkür və yanaşmasına uyğun sistem formalaşdırmaqda, bu sistemin bölgədəki durumun tələblərilə uzlaşmaq gücündə olmadığı deyilir. Daha sonra nazir bu 19 ildə hərçilərin və onların ailələrinin hüquqlarını pozmağa əsas verən qərarlar qəbul etməkdə suçlanır. 1998-ci ildə nazir S.Əbiyev ön cəbhədə xidmət edən hərbi qulluqçuların 3 qat əməkhaqqının 2 qat əməkhaqqı ilə əvəzlənməsi haqda qərar verib. Qərar qüvvədə olduğu 7 il ərzində minlərlə hərbçinin maddi itkilərinə səbəb olub. Bu 7 il ərzində hüquqları pozulmuş hərbçilərin iddialarını isə məhkəmələr birmənalı şəkildə qəbul etməkdən imtina ediblər. Hərbi xidmət döründə istifadə etmədiyi məzuniyyətlərə görə pul kompensasiyalarının ödnməsi haqda 20-yədək qüvvəyə minən məhkəmə qərarı olsa da nazir bu qərarların icrasından imtina edir.

Nazir korpus komandanlarının zabit və gizirlərin yerdəyişməsi haqda səlahiyyətlərini mənimsəməkdə ittiham edilir. Yalnız Naxçıvan korpusu komandanının öz səlahiyyətindən istifadə edə bildiyi qeyd olunur. Nazirin generalları bir vəzifədən başqa vəzifəyə keçirməsi faktları Ali Baş Komandanın səlahiyyətlərinin mənimsənilməsi sayılır. Rütbələrin, təltiflərin xidmətə görə yox, nazirin istəyinə uyğun baş verdiyi nəzərə çatdırılır. Attestasiya keçirilsə də karyera üzrə inkişaf attestasiyanın nəticələrinə görə deyil, nazirin şəxsi münasibətinə görə həllinin tapdığı iddia edilir.       

Daha sonra müraciətdə nazir S.Əbiyev onu tənqidə məruz qoyan mətbu orqanları, vətəndaş cəmiyyəti isntitutlarını, fərdi tənqidçilərini susdurmağa çalışmaq ittihamına məruz qoyulur. Bu insanlar barəsində kompromat toplanması tapşırığı verilir, hətta fiziki zorakılıq tətbiq olunması aktları hazırladılır. İctimai basqılar gücləndikdə isə S.Əbiyev basqılara cavab kimi hərbçiləri siyasi bəyanatlar verməyə məcbur edir.

Müraciətdə general-polkovniklər üçün həqiqi hərbi xidmətin son dövrünün 63 yaş olduğu və S.Əbiyevin 63 yaşaının bu ilin yanvarında tamam olması xatırladılır. 2013-cü ilin yanvarından bu yana S.Əbiyevin nazrilik dövrü qanunsuz adlandırılır.         

Son olaraq birlik rəhbəri müraciət etditi orqanlardan müdafiə naziri vəzifəsini tutan S.Əbiyevin qanuna zidd hərəkətlərinin araşdırılmasını tələb edir.-05D-