Blogerin işgəncələri

Mayın 9-da Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsində saxlanan filosof, bloger Rəşad Ramazanovun (Rashad Heqiqet Ağaaddin) taleyi hələ də qaranlıq olaraq qalır. 

Vəkil Rövşən Şirəliyev Turan-a bildirib ki, hələ də Rəşad Ağaddinin Bakı İstintaq təcridxanasına köçürülüb-köçürülməməsi barədə məlumat ala bilmir. 

Vəkil həmçinin blogerin işgəncələrə məruz qaldığını bildirib. 

“Mən onun bədəninə baxış keçirə bilmədim. Amma başında, qollarının görünən hissələrində qaysaqlamış açıq yaralar var. Qollarının qandal bağlanmış hissəsi də yaradır. Rəşad Ramazanova qarşı işgəncə o dərəcədə olub ki, fiziki və ən əsası isə mənəvi təsirlərinə dözməyərək saxlandığı kamerada özünə qəsdə cəhd edib”, deyə o qeyd edib. 

Rəşad Ramazanova qarşı Cinayət Məcəlləsinin 234.4.3-cü (qanunsuz olaraq külli miqdarda narkotik vasitələri saxlamaq və satmaq) maddəsi ilə ittiham irəli sürülüb. Mayın 10-da Nərimanov rayon məhkəməsi onun barəsində 3 ay müddətinə həbs qətimkan tədbiri seçib. 

Rövşən Şirəliyevin məlumatına görə, müvəkkili mayın 9-da günorta saatlarında metronun “20” yanvar stansiyası yaxınlığında saxlanılıb. Polisin məlumatına görə, ondan 9 qram heroin müsadirə edilib. Lakin Ramazanov bu ittihamı təkzib edib, deyə vəkil qeyd edib.

Ramazanov sosial şəbəkələrdə hakimiyyəti tənqid etdiyi üçün siyasi motivlərlə təqib olunduğunu hesab edir. O, öz facebook səhifəsində din, azadlıq, ədalət mövzularında statuslar yazırdı (Rashad Heqiqet Ağaaddin). 

Xüsusən, o, prezident vəzifəsinə İlham Əliyevin namizədliyinin üçüncü dəfə irəli sürülməsinə istehza edərək, onun, görünür Ginnesin rekordlar kitabına girmək istədiyini qeyd edir.

O, Azərbaycan hakimiyyətini “şeytan Əliyev rejimi” adlandırıb.

Vəkil Aslan İsmayılov da mayın 17-də ölkə ictimaiyyətini blogerin həyatını xilas etməyə çağırıb. 

O, ölkə prezidentinə məsələni araşdırmaq və Rəşad Ramazanova qarşı sərt davranan hər kəsi cəzalandırmaq xahişi ilə müraciət edib.

Öz növbəsində, Daxili İşlər Nazirliyinin mətbuat xidmətinin şöbə rəisi Orxan Mansurzadə bildirib ki, Baş Mütəşəkkil Cinayətkarlığa Qarşı Mübarizə İdarəsinə Ombudsman Aparatı və İşgəncələr Əleyhinə Komitə nəzarət edir.

Onun sözlərinə görə, Baş idarədə müvəqqəti saxlanma yeri Avropa standartlarına uyğundur. 

“Vəkilin blogger barəsində dedikləri müdafiə xarakterlidir və populist çıxışdır. Bu çıxış ictimai diqqəti cəlb etməyə hesablanıb və saxlanılan şəxsə işgəncə verilməsi ilə bağlı deyilənlər yalandır, heç bir əsası yoxdur”, deyə o qeyd edib. -03B-