Media Hüquqları İnstitutu: Qorxutmaq deyil, islahatlar aparmaq lazımdır

Azərbaycan rəhbərliyi diffamasiyaya görə cinayət məsuliyyətini ləğv etmək yerinə “düşmənlərin inadına” İnternetdə analoji cəza tətbiq etdi, bu barədə Media Hüquqları İnstitutunun direktoru Rəşid Hacılı Obyektiv TV-yə müsahibəsində bildirib.

Parlamentin AR CM-in 147 (böhtan) və 148-ci (təhqir) maddələrinə İnternetdə söz azadlığını məhdudlaşdıran düzəlişlər tələsik qəbul etməsi beynəlxalq aləmdə ciddi narahatlığa səbəb olub, belə ki, bu yaxınlarda ölkə prezidenti diffamasiyaya görə cinayət məsuliyyətini ləğv etməyi vəd edib.

Hacılının fikrincə, bu, beynəlxalq ictimaiyyət qarşısında öhdəliklərə açıq-aşkar məhəl qoymamaqdır. 2012-ci ildə təsdiq edilmiş insan hüquq və azadlıqlarının möhkəmləndirilməsi üzrə Milli Fəaliyyət Planında birmənalı olaraq “Diffamasiya haqqında” qanun qəbul edilməsi zərurəti qeyd edilib.

İlham Əliyev ATƏT-in mətbuat azadlığı üzrə nümayəndəsi Dunya Miyatoviçlə görüşündə də bunu deyib. Bu qanun layihəsi ötən il ölkə prezidentinin imzası ilə ekspertiza üçün Avropa Şurası Venesiya Komissiyasına göndərilib. Buna görə bu vədlərdən uzaqlaşmanı hakimiyyətin xaotik əhval-ruhiyyəsi ilə izah etmək olar.

Hacılı hesab edir ki, “yuxarılarda” xaos hüquq və azadlıqların kütləvi şəkildə pozulması fonunda virtual resurslarda ictimaiyyətin fəallaşması ilə əlaqədardır. Oktyabrda keçiriləcək prezident seçkiləri ərəfəsində hakimiyyət qələbə qazanacağından əmin deyil, bu səbəbdən İnternetdə də tənqidin qarşısını almaq qərara alınıb.

Parlamentdə hətta Facebook-a çıxışın bağlanması haqqında absurd təkliflər də səslənib. Lakin dünya hörümçək toruna çıxışı qadağan etmək ən azından ona görə mümkün deyil ki, bu gün bütün hökumətlər İnternet vasitəsilə əlaqə saxlayır.

Hacılının fikrincə, hakimiyyət üçün vəziyyətdən ən yaxşı çıxış yolu ictimaiyyətin səsini dinləyib islahatlar aparmaq, onların həyata keçirilməsində maraqlı olduğunu göstərmək, senzura basqılarını azaltmaq, fəal gənclərin qorxudulmasından əl çəkməkdir. -17D-