Boradigah sakinləri ölkə rəhbərliyindən kömək istəyirlər

Masallı rayonunun Boradigah qəsəbəsinin bir qrup sakini yerli məktəbin qəza vəziyyətində olması ilə əlaqədar ölkə rəhbərliyinə müraciət edib.

Prezident İlham Əliyevə, birinci vitse-prezident Mehriban Əliyevaya, elm və təhsil naziri Emin Əmrullayevə ünvanlanan müraciətdə bildirilir ki, Nizami Gəncəvi adına 1 saylı məktəb dərslərin keçirilməsi üçün təhlükəli vəziyyətə düşüb.

Məktəb  1974 cü ildə tikilib və xeyli istedadlı və savadlı şagird yetişdirib ki, onların arasında müstəlif sahələrdə çalışan yüksək səviyyəli mütəxəssislər var.

Məktəbin məzunları Azərbaycan ərazilərinin azad edilməsi uğrunda fədakarlıqla savaşıblar. “Şəhidlər Qeysər Məmmədov, Zəfər Cavadov, İnqilab Nağıyev, Fərasət Paşayev, İbrahim Rükabzadə bizim məktəbin məzunlarıdır. Məzunların arasında xeyli müharibə veteranı var”, -müraciət müəllifləri yazırlar.

Bununla yanaşı, onlar təəssüflə qeyd edirlər ki, son illərdə məktəb qəzalı vəziyyətə düşüb.

2022-ci ildə Təhsil Nazirliyinin Tikinti İdarəsi təmir məqsədilə məktəbin akt və idman zalının, bufetin damlarını söküb. Ertəsi gün isə söküntünü dayandırıblar. Bildiirblər ki, məktəbi Heydər Əliyev Fondu əsaslı təmir edəcək. O vaxtdan heç bir təmir işləri aparılmayıb.

Binanın  bir hissəsinin damı söküldüyündən məktəb yağış və qarın altında qalaraq, daha da qəzalı vəziyyətə düşüb. Hər an uçmaq təhlükəsi var.

2023 cü ildə Bakı Şəhərsalma İdarəsinin əməkdaşları məktəbə baxış keçiriblər, binanın qəzalı vəziyyətdə olduğunu təsdiqləyiblər. Lakin heç bir təmir işləri görməyiblər.

Şagirdlər məktəbdə idman dərslərini keçə bilmirlər, akt zalı yararsız olduğundan tədbirlər dəhlizdə keçirilir,  bufet xidmətindən istifadə edə bilmirlər, müraciət müəllifləri qeyd edirlər.

İstilik sistemi dağıldığından sinif otaqları odun sobası ilə qızdırılır. 270 şagirdi, 25 müəllimi, 17 texniki işçisi olan məktəbin otaqları həddən artıq soyuq olduğundan şagirdlər və müəllimlər tez -tez xəstələnir. Bu isə dərsə davamiyyətə çox ciddi təsir göstərir.

Müracətin sonunda Boradigah sakinləri ölkə rəhbərliyindən məktəbin təmirinə kömək göstərilməsini xahiş edirlər,