Əfqan Sadıqov aclığı dayandırmaqdan imtina edib

“Azel” TV saytının rəhbəri,   Gürcüstanda həbs edilmiş Əfqan Sadıqov 49 günlük aclıq müddətində 28 kiloqram arıqlayıb, o, ağrılardan və yuxusuzluqdan əziyyət çəkir, lakin etiraz aksiyasını dayandırmaqdan imtina edir.

Noyabrın 8-də Əfqan Sadıqov xanımına zəng edib. "O dedi ki, ağrılardan səhərə qədər yata bilmir. Aclığa başlayandan 28 kiloqram çəki itirib. Əfqanın qalın paltarda çəkisi 65 kiloqram olub. Aclığa başlayanda 93 kiloqram idi. Çox ağır durumdadır. Hər an komaya düşə bilər”, - jurnalistin xanımı Sevinc Sadıqova bildirib.

Jurnalist xanımına deyib ki, yanına iki din xadımi gəlib və onu aclığı dayandırmağa razı salmağa çalışıblar. “Onlar özlərini Qafqaz Müsəlmanları İdarəsinin üzvləri kimi təqdim ediblər və bildiriblər ki, “müsəlman qardaşları” ziyarətə gəliblər. Əfqana deyiblər ki, Allahın verdiyi cana əzab verməsin, qıymasın. Əfqan isə deyib ki, Allah buyurub ki, zalıma qarşı çıx, mübarizə apar”, - Sadıqova bildirib.

O həmçinin deyib ki, həbs müddətinin uzadılması ilə bağlı məhkəmə qərarını noyabrın 8-də Əfqana təqdim ediblər və bildiriblər ki, 48 saat ərzində apellyasiya şikayəti verə bilər.

* Əfqan Sadıqov təqibdən ehtiyat edərək, 2023-cü ilin dekabrında ailəsilə birlikdə Gürcüstana gedib. İyulda  onu Gürcüstandan Türkiyəyə buraxmayıblar və deyiblər ki, ancaq Azərbaycana qayıda bilər.

Avqustda Azərbaycanın sorğusu əsasında Əfqan Sadıqov həbs edilib. Bakıda onu hədə yoluyla tələb etməkdə ittiham edirlər və ekstradisiyasını tələb edirlər. O, həbsinə və ona sığınacaq verilməməsinə etiraz olaraq sentyabrın 21-dən aclıq edir.Oktyabrın 8-də aclıq nəticəsində vəziyyəti pisləşib və onu  həbsxana xəstəxanasına köçürüblər.