Bos Shelf işçilərinin tələbləri qismən təmin edilib

Bos Shelf dəniz neft platformalarının istehsalat zavodunun işçilərinin martın 18-də irəli sürdükləri sosial tələbləri qismən təmin edilib.

Xatırladaq ki, müəssisənin minə yaxın işçisi əmək haqqının artırılması, tibbi sığorta ilə təmin edilmələri və məzuniyyətlərin artırılması tələbləri ilə tətil keçirmişdilər.

Tətilçilərin nümayəndələri müəssisə rəhbərliyi tərəfindən qəbul edilmişdi, rəhbərlik tələblərə baxacağını vəd etmişdi. Tələblər yerinə yetirilmədiyi halda işçilər aprelin 1-dən etibarən tətili bərpa etmək niyyətində idilər.

Neftçilərin Hüquqlarını Müdafiə Komitəsinin rəhbəri Mirvari Qəhrəmanlının Turan-a verdiyi məlumata görə, işçilərin tələbləri qismən yerinə yetirilib. Onun sözlərinə görə, zavod rəhbərliyi kollektivlə və Neftçilərin Hüquqlarını Müdafiə Komitəsi ilə dialoq qurub.

Zavodda həmkarlar ittifaqı komitəsinin yeni sədri olaraq Allahyar Eyyubov – etibar sahibi olan şəxs seçilib. 

Bundan başqa, işçilərin tibbi sığorta ilə təmin edilməsi tələbi təmin edilib. Onların ailə üzvlərinin tibbi müayinə xərcləri 50% qarşılanacaq.

Məzuniyyət günlərinin sayının konkret işçinin iş stajına və işinin risk dərəcəsinə görə artırılması məsələsi də həll edilib. İşçilərin pulsuz yeməyinin keyfiyyəti yaxşılaşdırılıb. Lakin əmək haqqının artırılması məsələsində cüzi dəyişiklik var.

Belə ki, əvvəllər əmək haqqının ödənilməsi zamanı dollar 0,78 manat kursu ilə  manata çevrilirdisə, indi kurs yuvarlaqlaşdırılaraq, 1 dollar 0,80 manatdan hesablanacaq.

Bundan başqa, Bos Shelf-in Dərin Özüllər Zavodu ilə birləşməsi nəticəsində buraya gələn işçilərlə əvvəlki işçilərin əmək haqları bərabərləşdirilib. Bu kateqoriyanın əmək haqqı artımı 10% təşkil edib.

Eyni zamanda, zavod rəhbərliyi heç kimi işdən çıxarmamağı və layihə işləri artırılacağı təqdirdə əmək haqlarını artırmağı vəd edib.

Həmkarlar İttifaqı Komitəsinin yeni rəhbəri Allahyar Eyyubov Turan-ın müxbiri ilə söhbətində əmək kollektivi və rəhbərlik arasında konstruktiv dialoq başladığını bildirib.

O, həmçinin tibbi sığorta məsələlərinin həll edildiyini, fərqli işçilər tərəfindən görülən eyni işə görə maaş fərqinin aradan qaldırıldığını, pulsuz qida keyfiyyətinin yaxşılaşdırıldığını, hazırda əmək şərtlərinin yaxşılaşdırılması məsələlərinin həll olunduğunu təsdiq edib. -06B-