Nəqliyyat Nazirliyi Bakıda ictimai nəqliyyatda kart ödəniş sisteminin tətbiqini iflasa uğradıb

Nəqliyyat Nazirliyi Bakıda ictimai nəqliyyatda kart ödəniş sisteminin tətbiqinin öhdəsindən gələ bilməyib. Sistem mərhələli həyata keçiriləcək və 2015-ci ilin yayında başa çatacaq. 

Bakıda ictimai nəqliyyatda intellektual idarəetmə sisteminin tətbiqi layihəsinə əsasən, avtobuslarda, paralel olaraq metroda kart ödəniş sisteminin tətbiqi 2011-ci ilin fevralında baş tutmalı idi. Müxtəlif obyektiv və subyektiv səbəblərdən proses bu ilin mayına kimi uzanıb. Ötən şənbə günü nazir Ziya Məmmədov jurnalistlərlə söhbətində deyib ki, may ayının sonundan ilk 100 avtobusda vahid kart sistemi tətbiq ediləcək. Bu il ərzində vahid kart sisteminin tətbiq ediləcəyi avtobusların sayının 1000-ə çatdırılması nəzərdə tutulub. Proses "2015-ci ildə keçiriləcək ilk Avropa Olimpiya Oyunlarına kimi bu sistem tamamilə başa çatdırılacaq və vətəndaşların istifadəsinə veriləcək", - deyə o bildirib. 

Bu yaxınlarda mətbuat konfransında Nəıqliyyatın İntellektual İdarəetməsi Mərkəzinin (NİİM) rəhbərliyi qeyd edib ki, vahid kart sistemi bir mərhələdə tətbiq olunacaq və başqa formalar ola bilməz. Sistemin testi 2012-ci ilin mayında uğurla başa çatıb. 

Avtobus sürücüləri deyir ki, kart sistemi nəqliyyat şirkətlərinə sərf  etmir: «Kart sistemi sürücü ilə iş verən arasında münasibətlərin plan sistemindən imtinanı nəzərdə tutur.  Bu gün sürücü hansı yolla olur olsun şirkətin gündəlik planını ödəyir və faktiki olaraq sərnişin axınının həcmindən asılıdır. Şirkət isə stabil gəlir və mənfəət əldə edir. Kart sistemində isə sürücü zəmanətli əmək haqqı alacaq, şirkətin gəlirləri isə azala da bilər», deyə Bakının marşrut avtobuslarından birinin Əli adlı sürücüsü deyir. 

«Multimedia» mərkəzinin direktoru Osman Gündüz bildirdi ki, Nəqliyyat Nazirliyinin kart sistemini pilot qaydasında tətbiq edəcəyi mümkündür. Texniki tərəfdən problem olmamalıdır, deyə o qeyd edib. 

NİİM mətbuat xidmətində Ziya Məmmədovun bəyanatını şərh etməyiblər.  NİİM-in məlumatına görə, Bakıda 115 marşrutda 2000 avtobus işləyir. 08B