Cəmil Həsənlinin qızının vəkili ekspert rəyinə etirazını bildirib

Dünən Bakı Apellyasiya Məhkəməsində Əflatun Qasımovun sədrliyi ilə Demokratik Qüvvələrin Milli Şurasının sədri Cəmil Həsənlinin qızı Günel Həsənlinin şikayətinə baxılması davam edib.

Şikayət birinci instansiya məhkəməsinin qərarından verilib. Xatırladaq ki, fevralın 22-də Yasamal rayon məhkəməsi Güneli 2014-cü ildə 87 yaşlı Adilə Səlimovanı maşınla vurmaqda təqsirli bilib və cəzasını məntəqə tipli cəzaçəkmə müəssisəsində çəkməklə, il yarım müddətinə azadlıqdan məhrum edib.

Sentyabrın 11-də Bakı Apellyasiya Məhkəməsi apellyasiya şikayətinə mahiyyəti üzrə baxılmasına başlayıb.

Sentyabrın 28-də müdafiə tərəfin vəsatəti ilə təkrar məhkəmə-tibbi ekspertiza təyin edilib.
    Noyabrın 13-də BAM-da proses bərpa olunub.

Lakin iclasda məlum olub ki, yeni ekspertizanın rəyini ibtidai istintaqa rəy verən həmin ekspert verib.

Vəkil Adil İsmayılov buna etiraz edib, belə ki, qanun ekspertin bir iş üzrə təkrar rəy verməsini qadağan edir.

Bundan başqa, vəkilin sözlərinə görə, hər iki rəydə rentgen müayinəsinin nəticələrinə istinad var və iddia olunur ki, YNH nəticəsində Səlimovaya bədən xəsarətləri yetirilib. "Amma bu rentgen müayinəsi haradadır? İş materiallarında belə bir sənəd yoxdur", deyə vəkil bildirib.

Lakin hakim etirazı təmin etməyib.

Zərərçəkmiş Səlimova öz növbəsində, məhkəməyə G.Həsənlidən şikayəti olmadığı haqqında ərizə verib və onun cinayət təqibinə xitam verilməsini xahiş edib.

Prokuror hökmü qüvvədə saxlamağı xahiş edib.

Vəkilin yekun çıxışı noyabrın 19-da olacaq. -06D-