Daxili İşlər Nazirliyi icazəsiz səfərlərin qarşısının alınacağı ilə bağlı xəbərdarlıq yayıb

Bakı/29.12.20/Turaan: Daxili İşlər Nazirliyi bayram günlərində və həftə sonlarında icazəsi olmayan şəxslərin bölgələrə səfərinin qarşısının alınacağı ilə bağlı xəbərdarlıq yayıb.

“Verilən icazədən sui-istifadə hallarının qarşısının alınması məqsədi ilə bir daha nəzərə çatdırırıq ki, həftənin şənbə və bazar, habelə bayram günləri xüsusi karantin rejimi tətbiq edilmiş inzibati ərazilərə giriş və ya çıxış etməyə cəhd edənlər karantin postlarından buraxılmayacaq,” Daxili İşlər Nazirliyi əhalini xəbərdarlıq edib.

Nazilrik bildirir ki, bu bölgələrə səfərlər yalnız müvafiq ezamiyyə vərəqələri və ya “icaze.e-gov.az” portalına daxil edilən məlumatlar çrçivəsində mümkündür.

Nazirlik vətəndaşları xəbərdar edir ki, sərtləşdirilmiş xüsusi karantin rejimi tətbiq olunan şəhər və rayonların inzibati ərazilərində, reydlər keçiriləcək iş icazələrindən sui-istifadə edərək istirahət mərkəzlərində olan şəxslər aşkar ediləcəyi təqdirdə həmin icazələr ləğv ediləcək, habelə onlar qanunvericiliyə uyğun olaraq, məsuliyyətə cəlb olunacaqlar.

Daxili İşlər Nazirliyinin mətbuat xidmətinin məlumatına görə, dekabrın 28-də polis postlarından müvafiq qaydada icazə almadan keçməyə cəhd göstərən 2538 nəqliyyat vasitəsi müəyən olunaraq geri qaytarılıb. Həmçinin dekabrın 28-də ölkə üzrə karantin rejimi qaydalarını pozan 2365 nəfər barəsində inzibati tənbeh tədbiri tətbiq olunub.-0-