Daxili İşlər Nazirliyinin Kollegiyası olub

|Noyabrın 27-də Daxili İşlər Nazirliyində  təqsirləndirilən və xəbərsiz itkin düşmüş şəxslərin axtarışı, tanınması mümkün olmayan meyitlərin şəxsiyyətinin müəyyənləşdirilməsi, polis sahə rəislərinin və sahə inspektorlarının fəaliyyətinin təşkili və cinayət və hadisələr barədə məlumatların qəbulu, qeydiyyatı və baxılması sahələrində  görülən işlərin vəziyyətinə  həsr olunmuş geniş kollegiya iclası keçirilib. Bu barədə Daxili İşlər Nazirliyinin mətbuat xidməti məlumat yayıb. 

Baş Cinayət-Axtarış İdarəsinin rəisi Emin Şəkinski bildirib ki, bu il axtarışda olan 1740 şəxs tutulub, MDB ölkələrinin hüquq-mühafizə orqanları tərəfindən axtarılan 166 nəfərin yeri müəyyən edilib.

Baş İctimai Təhlükəsizlik İdarəsinin rəisi Cavanşir Məmmədov bildirib ki, ötən dövrdə 72, o cümlədən Bakı şəhəri üzrə 42 polis sahə məntəqəsi istifadəyə verilib, habelə 33-nün tikintisi davam etdirilir. 

Onun sözlərinə görə, İctimai Şuraların formalaşdırılması işi yekunlaşıb və bu günədək 3.810 vətəndaş, o cümlədən 192 nəfər təqaüddə olan polis əməkdaşı Şura üzvlüyünə qəbul edilib. “Bu il açılması təmin edilmiş 13.720 cinayətin 70 faizi, o cümlədən 81 qəsdən adam öldürmə, 198 qəsdən sağlamlığa ağır zərər vurma, 1.614 oğurluq, 671 dələduzluq, 113 soyğunçuluq, 69 quldurluq, narkotik vasitələrin qanunsuz dövriyyəsi ilə bağlı 1.231 cinayətin açılmasında, eləcə də axtarışda olan təqsirləndirilən şəxslərdən 52,6 faizinin tutulmasında polis sahə rəislərinin və polis sahə inspektorlarının iştirakı olub. 

Baş İstintaq və Təhqiqat İdarəsinin rəis müavini, Təhqiqat İdarəsinin rəisi Emil Usubov bildirib ki, bu ilin 9 ayında daxil olmuş 70621 cinayət xarakterli məlumat araşdırılıb, onların 86 faizi təhqiqatçıların icraatında olub. “2011-ci ilin analoji dövrü ilə müqayisədə icraatda olan materialların sayı ötən 9 ayda 30 faizədək, nazirliyə ünvanlanan şikayətlərin sayı 4 dəfə və ya 3987 fakt azalıb”, - o qeyd edib. 

Daxili işlər naziri Ramil Usubov gündəlikdəki məsələlər üzrə polis orqanlarının fəaliyyətini bütövlükdə qənaətbəxş qiymətləndirib. Nazir həmçinin  müəyyən nöqsan və çatışmazlıqların mövcudluğunu da qeyd edib və  aidiyyəti baş idarə, idarə və ərazi polis orqanlarının rəhbərlərindən onların qısa müddətdə aradan qaldırılmasını tələb edib. 

Nazir Usubov cinayətkarlığa qarşı mübarizədə səylərin daha da artırılmasının, ağır və xüsusilə ağır cinayətlərin açılmasının, axtarışda olanların tutulması işinə bütün qüvvə və imkanların səfərbər olunmasının, əməliyyat-xidməti fəaliyyətin səmərəliyinin yüksəldilməsinin  əhəmiyyətini vurğulayıb.-03D-