DEVAMM islamçı siyasi məhbusları azad etməyə çağırıb

Dini Etiqad və Vicdan Azadlıqlarının Müdafiə Mərkəzi (DEVAMM) son vaxtlar bir qrup siyasi məhbusun azad edilməsini müsbət qiymətləndirib.

“Son günlər ictimai-siyasi fəaliyyətinə və ifadə azadlığına görə həbs edilmiş bir qrup fəal azad edilib, ümid edirik ki, bu proses davam etdiriləcək”, deyə bəyanatda bildirilir.

Təşkilat ReAl hərəkatının lideri İlqar Məmmədovun, jurnalist Xədicə İsmayılovanın və digər siyasi məhbusların da azad ediləcəyini gözləyir.

Eyni zamanda, böyük bir qrup dindar, o cümlədən məşhur islamçılar – İslam Partiyasının lideri Mövsüm Səmədov, ilahiyatçılar Fəramiz Abbasov, Abgül Süleymanov, Elşən Mustafaoğlu, Ceyhun Cəfəroğlu və başqaları həbsdə qalır.

DEVAMM bəzən vətəndaş cəmiyyətində siyasi məhbuslara qarşı ayrıseçkilik nümayiş etdirilməsi və dindarların hüquqlarının müdafiə olunmaması ilə bağlı təəssüfünü bildirir. Bu, “qlobal islamofobik sürəcin əks-sədasıdır və istər məmurların, istərsə də vətəndaş cəmiyyətinin bəzi mənsubları bu ksenofobik sürəcin təsiri altına düşüblər”.

Son olaraq DEVAMM Azərbaycan hakimiyyətini bütün qalan siyasi məhbusları, o cümlədən dini etiqad azadlığına görə həbs olunanları azad etməyə çağırır. -06D-