Din xadimləri ilk dini təkmilləşdirmə kursunu başa vurdular

Qafqaz Müsəlmanları İdarəsində (QMİ)  təkmilləşdirmə kursunu başa vuran din xadimlərinə sertifikatların təqdim olunması mərasimi keçirilib.

Azərbaycanda din xaidmlərinin təkimilləşdirmə kurslarına cəlb olunmaları ilk dəfə  həyata keçirilir və 50 nəfər din xadimi bu kursu başa vurub. Təqdimat mərasimində çıxış edən QMİ sədri, seyxüilslam Allahşükür Paşazadə bu kursları dinə baxışda yenilik kimi dəyərləndirib. Din xadimlərinin din- dövlət münasibələrinə dair yeni bilgilər aldığını nəzərə çatdırb. “Siz artıq kurs keçilənə qədərki din xadimləri deyilsiniz, moizələrinizdə, radikal cərəyanlara münasibətdə fərqli olmalısınız”, - QMİ sədri din xadimlərinə konkret fəaliyyət istiqamətləri göstərib. İslamdaxili fərqliliklərin olduğunu deyən A.Paşazadə bəzi radikal cərəyanların bundan istifadə edərək ölkədə dini qarşıdurma yaratmaq istədiklərini nəzərə çatdırıb. “Biz dini zəmində qarşıdurmaların olmasına yol verməyəcəyik, əgər kimlərsə buna cəhd edərsə dövləti və bizləri qarşısında görəcək”, - A.Paşazadə xəbərdarlıq edib. 

Eyni zamanda A.Paşazadə telekanallarda dinin və din xadimlərinin birtərəfli olaraq tənqidi təbliğatına da etiraz edib. “Mən demirəm ki, tənqid etməyin, amma bir dəfə tənqidi tərəfi deyəndə, bir dəfə də müsbət tərəfini təbliğ edin”, - QMİ sədri etirazını ifadə edib.

A.Paşazadə bu kurslarda imamlarla axundların yəni, əhli-şiə və əhli-sünnə  din xadimlərinin birgə təlim almalarını “olduqca önəmli hadisə” kimi dəyərləndirib.   Din xadimlərinin vahid geyim formasına gəlincə, QMİ sədri bu geyim üzərində işin getdiyini və  yaxın günlərdə din xadimlərinə təqdim olunacağını söyləyib.

Dini Qurumlarla iş üzrə Dövlət Komitəsinin sədr müavini Səyyad Aran təkmilləşdirmə kursu keçən din xadimlərinə “seçilmiş insanlar”, “ictimai xadimlər” olmalarını xatırlatıb. O,  din xadimlərinə radikal cərəyanlara qarşı konkret mübarizə aparmağı tövsiyə edib: “Onlar sizin yerinizi tutmaq istəyir, əgər onlara qarşı mübarizə aparmasanız, onların təbliğatına qarşı əks təbliğat qurmasanız sonunda onlar bu yerləri tutacaqlar”.

Kursu başa vuran din xadimlərindən bəziləri çıxış edərək onlara yaradılan şəraitdən, təchizatdan, mühazirələrin səviyyəsindən razılıq ediblər.  

Tədbirin sonunda din xadimlərinə sertifikatlar, “Quran-i-Kərim” və başqa dini kitablar təqdim olunub.-05C-