Dini komitə maarifləndirmə konfransı keçirir

Dini Qurumlarla İş üzrə Dövlət Komitəsi çərşənbə günü Bakıda “Dövlət-din münasibətləri və maarifləndirmə işi” mövzusunda respublika konfransı keçirilib.

Tədbirə dini icma sədrləri, fəal dindar və ilahiyyatçılar qatılıblar. Konfransı giriş sözü ilə açan komitə sədri Elşad İsgəndərov konfransın buna qədər Azərbaycanın 8 bölgələsində keçirilən silsilə tədbirlərin yekunu olduğunu diqqətə çatdırıb. 

Konfransın əsas məqsədinin dövlət-din münasibətlərini daha yüksək səviyyədə tənzimləməsi, dini maarfiləndirmə işinin təşkili, dini icmaların cəmiyyətdə radikalizm meyillərinin qarşısının alınması olduğu qeyd edilib. 

Ölkədə dinlərarası tolerantlığın yüksək səviyyədə olduğu deyilib. Dini icmalarla dövlət, müxtəlif dini icmalar arasında münasibətlərin yüksək səviyyədə olduğu vurğulanıb. Komitə sədri dini icmaların komitə ilə sıx əməkdaşlığının zəruriliyini önə çəkib, bu yöndə birgə fəaliyyətin davam etdirilməsinin vacibliyini söyləyib. “Dini icmaların sosial layihələrinə dəstək proqramı”nın qalibləri elan olunub, layihələrin icrası ilə bağlı sertifikatlar təqdim edilib. Ötən Ramazan ayı ərəfəsində dini icmaları sosial layihələrə cəlb etmək üçün elan edilən proqrama hər biri 5000 manat olmaqla 40-a yaxın layihə təqdim edilib.

Daha sonra çıxış edən dini icma nümayəndələri son illər maarifləndirmə, dini qurumlar arasında sıx əlaqələrin qurulması sahəsində həyata keçirilən tədbirləri bəyəndiklərini deyiblər. 

Konfransı “Milli-mənəvi dəyərlərə baxış: tarixilik və müasirlik”, “Dini radikalizm və onunla mübarizə üsulları”, “İslamda orta yol” panelləri üzrə “Milli-mənəvi dəyərlərimizə dövlət qayğısı”, “Azərbaycanda ənənəvi İslam və xarici təsirlər”, “İslamın radikalizmə və ifratçlığa qarşı münasibəti”, “Dini radikalizm və ifratçılıqla mübarizənin metodologiyası”, “Vəhdət naminə məzhəblərarası dialoq”, “Vətənpərvərlik milli-mənəvi dəyər kimi” mövzuları üzrə məruzələrlə davam edib. -05D-