Aparıcı müxalifət M.Hüseynovu müdafiə etdi

Müsavat Partiyası gənc siyas fəal, tanınmış fotoreportyor Mehman Hüseynovun saxlanmasına etiraz bəyanatı yayıb. 

Sənəddə M.Hüseynovun oktyabrın 2-də səhər vaxtı naməlum istiqamətə aparılmasını oğurluq kimi dəyərləndirir. M.Hüseynovun oğurlanması əməliyyatını icra edənlərin bu qanunsuz əməli saatlarla ictimaiyyətdən gizli saxlanılıb, onun harada saxlanılması haqda ictimaiyyətə informasiya verilməyib. 

M.Hüseynovun saxlanılma forması, vəkili ilə görüşünə imkan verilməməsi özbaşınalıq və kobud qanun pozuntusu adlandırılır. M.Hüseynovun saxlanılmasını müəlliflər Əliyevlər rejiminin onu demokratiya uğrunda fəal mübarizədən çəkindirmək, seçki kampaniyası dövründə artan siyasi fəallığın qarşısını almaq cəhdi kimi dəyərləndirir. Bu fakt həm də azad düşüncənin susdurulması cəhdi, rejimin gənclərə tətbiq etdiyi repressiyanın tərkib hissəsi hesab edilir. Müəlliflər rəsmi Bakını qanunsuz əmələ son qoymağı və M.Hüseynovu dərhal sərbəst buraxmağı tələb edir.

Eyni məzmunlu bəyanatla Xalq Cəbhəsi Partiyası da çıxış edib. Müəlliflər gənc fəal, bloger M.Hüseynovun oğurlanmasını, hüquq-mühafizə orqanları tərəfindən təzyiqə məruz qalmasını şiddətlə pisləyir. Müəlliflər baş verənləri azad və tənqidi düşüncəyə qarşı növbəti zorakılıq kimi dəyərləndirir. Rəsmi Bakıdan növbəti səhv etməkdən özünü saxlamağı və M.Hüseynovu sərbəst buraxmağı tələb edir. -05D-