Sentyabrda ipoteka kreditləşməsi azalıb

Azərbaycan İpoteka Fondunun (AİF) müvəkkil bankları 2013-cü ilin sentyabrında ümumi məbləği 2,05 mln manat olan ipoteka kreditləri veriblər. Bu, ötən aydakından 2,2 dəfə, iyuldakından 6 dəfə azdır. 

AİF-in məlumatına əsasən, hesabat ayında Fond 6,97 mln manat krediti təkrar maliyyələşdirib. İlin əvvəlindən ümumi təkrar maliyyələşmə məbləği 51,95 mln manat təşkil edib. 

2006-cı ilin əvvəlindən Fondun xətti ilə 496,9 mln manat, ilin əvvəlindən 80,21 mln manat ipoteka krediti verilib. Kredit alanların 39%-i 18-29 yaşında, 33%-i 30-35, qalan 28%-i 36 yaşdan yuxarı olanlar alıb. 

Dövlət təkcə sosial ipotekaya yardım edir. Bunun üçün son 2 ildə hər il 20 mln büdcə vəsaiti ayrılıb. 2013-cü ildə bu məbləğ 2 dəfə çox olub. 

Kommersiya ipotekası AİF istiqrazlarının buraxılışı hesabına maliyyələşir. 2009-2012-ci illərdə Fond 55 mln və 75 mln, 60 mln və 20 mln və 30 mln manat olan 5 emissiya yerləşdirib. Ötən ilin dekabrında Fondun 40 mln manat məbləğində sənədsiz, təminatlı, adlı istiqrazları qeydiyyata alınıb. Bu emissiyadan tam yerləşdirilib. Yeni 20 mln-luq emissiya sentyabrın son günü dövlət qeydiyyatına alınıb. Görünür, bu səbəbdən banklar avqustdan etibarən kreditləşməni kəskin azaldıb. 

İpoteka kreditləri Azərbaycan vətəndaşlarına, 50 min manata qədər, 25 ilədək müddətə, illik 8%-dən çox olmamaqla verilir. 

Güzəştli kreditlər 50 min manatadək, 30 ilə qədər müddətə, illik 4%-dək dərəcə ilə verilir. --15В--