MSK sədri demokratik seçki üçün bütün şəraitin olması iddiasındadır

Mərkəz Seçki Komissiyası (MSK) ölkədə prezident seçkiləri prosesini işıqlandırmaq üçün çərşənbə günü “Hilton” otelində Müstəqil Mətbuat Mərkəzinin açılışını edib. 

Açılışdan sonra MSK sədri Məzahir Pənahov seçkilərə hazırlığın durumu ilə bağlı mətbuat konfransı keçirib. M.Pənahov iddia edib ki, seçki prosesinin şəffaflığı, səsvermənin demokratik keçirilməsi üçün bütün şərait var. Mətbuat mərkəzi yüksək sürətli İnternetlə təmin edilib. “Bu təcrübə inkişaf etmiş ölkələrdə tətbiq olunur və seçki prosesinin şəffaf işıqlandırılmasında maksimum nəticə sayılır”, - deyə MSK sədri mərkəzin açılışına maksimalist qiymət verib.  

Səsvermə ilə bağlı ölkədə və xarici ölkələrdəki Azərbaycan səfirlik, konsulluq və nümayəndəliklərində 5491 məntəqə yaradılıb. Bu məntəqələrdə 5 milyon 145 minə yaxın seçici öz seçimini edəcək. Məntəqələrin 20%-i veb-kameralarla təhciz olunub. Prezident seçkilərini izləmək üçün 40 minə yaxın müşahidəçi qeydiyyatdan keçib, prosesi 50 beynəlxalq təşkilatı təmsil edən 1300-dən artıq beynəlxalq müşahidəçi izləyə biləcək.

M.Pənahov İTV-də prezident seçkilərilə bağlı debatlara münasibətdə sivil dünyanın bunlara alışdığını deyib. Bunu həm də namizədlərin səviyyəsi adlandırıb. M.Pənahov bu debatlarda prezidentliyə namizəd Hafiz Hacıyevin təhqirlərinə göz yumub. Debatlarda prezidentin şərəf-ləyaqətini ləkələməyin yolverilməz olduğu və buna görə Milli Şuranın prezidentliyə namizədi Cəmil Həsənliyə xəbərdarlıq edildiyi qeyd olunub. -05C-