Dini sahədə yeni qanunverici məhdudiyyətlər dalğası

Yaxın vaxtlarda Milli Məclis qanunvericiliyə dini həyat məsələlərini sərtləşdirən, terrorçu və ekstremist fəaliyyətə görə  məsuliyyəti artıran düzəlişlər paketini nəzərdən keçirəcək.

Ötən gün layihə parlamentin Hüquq siyasəti və dövlət quruculuğu məsələləri komitəsində təqdir edilib.

Belə ki, vətəndaşlıq haqqında qanunun 18-ci maddəsinə terrorçu fəaliyyətə və Azərbaycanın konstitusiya quruluşunun zorla dəyişdirilməsinə dair hərəkətlərə görə vətəndaşlıqdan məhrumetmə barədə əlavə ediləcək.

Həmçinin  dini ekstremizm, və ya dini təhsil adı altında xaricdə hərbi təhsilə, xaricdə dini münaqişələrdə iştirak etməyə və başqalarını buna cəlb etməyə görə  cəza nəzərdə tutulub.

Bundan əlavə, CM-ə yeni - 168-1.2-ci maddənin daxil edilməsi təklif olunur. Bu maddəyə görə, əcnəbilər və vətəndaşlığı olmayan şəxslər dini təbliğata görə həbs olunacaqlar (2 il müddətinə qədər).

Bu hərəkətlər təkrar və ya qabaqcadan əlbir olmuş bir qrup şəxs tərəfindən törədildikdə cəza müddəti artacaq (5 ilədək).

Bununla yanaşı “Dini etiqad azadlığı haqqında” qanuna düzəlişlər təklif edilib ki, bu da ölkədə müsəlman dini ayinlərinin yalnız Azərbaycan vətəndaşlarının həyata keçirməsini nəzərdə tutur. Xaricdə dini təhsil alanların mərasim keçirməsi qadağan olunacaq.

Pozuntuya görə 1000 manatdan  5000 manatadək cərimə və 1 ilədək azadlıqdan məhrumermə cəzası nəzərdə tutulur.

Digər düzəlişə görə, dini sitayiş yerlərindən kənarda ictimai nəqliyyatda dini atributların nümayişi qadağan olunacaq, o cümlədən dini bayraqlar ibadət yerlərində, dini mərkəz və müəssisələrdə asıla bilər.

Nəhayət, İnzibati Xətalar Məcəlləsinə  valideynlərin məsuliyyəti ilə  düzəliş edilib. Belə ki, əgər övladları bir ay ərzində bir həftədən çox dərs buraxarsa valideyn 100 manat həcmində cərimə ediləcək. —06D-