Dövlət Təhlükəsizlik Xidmətinin işçiləri siyasi məhbusa onlarla əməkdaşlıq təklif edirlər

Bakı/01.05.17/Turan: NİDA Hərəkatının həbsdə olan üzvü İlkin Rüstəmzadə Dövlət Təhlükəsizlik Xidmətinin nümayəndələrinin ona təzyiqləri barədə bildirib. Belə ki, onlar İ.Rüstəmzadədən onlara işləməyi tələb edirlər. Bu barədə onun hərəkat yoldaşı Ülvi Həsənli  Facebook səhifəsində yazıb.

“Bu gün İlkin Rüstəmzadə ilə danışdım. O xahiş etdi ki, onun sözlərini olduğu kimi çatdırım. Dövlət Təhlükəsizliyi Xidmətinin əməkdaşları bir neçə dəfə onun yanına gələrək onlarla əməkdaşlıq etməsini tələb ediblər. Ancaq o rədd edib.

Sonuncu dəfə ona açıq şəkildə deyiblər ki, əgər imtina edərsə həbsdən çıxmayacaq. “Burada sənə tibbi yardım göstərilməyəcək və sən öləcəksən” deyiblər.

Sonra  da təəccüb edirik ki, necə olub ki, Mehman Qələndərli özünü asıb. Deməli, onu bu həddə çatdırıblar”, - Ü.Həsənli yazıb.

Dövlət Təhlükəsizliyi Xidmətinin mətbuat xidmətindən şərh almaq mümkün olmayıb.

Xatırladaq ki, İlkin Rüstəmzadə NİDA Gənclər Hərəkatının həbs edilən 8 üzvündən biridir. Gənclər kütləvi iğtişaşların təşkili, narkotik maddə və silah saxlamaq kimi saxta ittihamlarla uzun müddətə həbs olunublar.

Onların həbsinə 2013-cü il martın 10-da Bakının mərkəzində əsgər ölümünə etiraz aksiyası təşkil etmələri  səbəb olub.

Ağır Cinayətlər Məhkəməsi Zaur Qurbanlı və Rəşadət Axundovu 8 il, Rəşad Həsənov və Məmməd Əzizovu 7,5 il,  İlkin Rüstəmzadə, Bəxtiyar Quliyev və Üzeyir Məmmədlini 7 il, ən gənc fəal 17 yaşlı Şahin  Novruzlunu 6 il azadlıdqan məhrum edib.

Amnesty International hüquq-müdafiə təşkilatı həbs edilən NİDAçıları “vicdan məhbusları” adlandırıb.

Sonradan İlkin Rüstəmzadədən başqa digərləri əfv və amnistiya aktları çərçivəsində azadlığa çıxıblar.-02D-