Açiq mənbələrdən foto.
Dronlardan istifadə haqqında yeni normativlər onlardan istifadə qaydalarını yumşaltmır
Bakı/19.03.21/Turan: Martın 14-də Azərbaycanda polis Novxanı qəsəbəsində məmurun – “Azəravtoyol” Açıq Səhmdar Cəmiyyətinin sədri Saleh Məmmədovun villasını dron vasitəsilə çəkən blogerlər Mehman Hüseynovu və Ülvi Həsənlini saxlayıb.
Prezidentin 12 yanvar 2018-ci il tarixli fərmanı ilə pilotsuz uçuş aparatlarından istifadə ilə bağlı məsələlər Dövlət Mülki Aviasiya Agentliyinə həvalə edilib. Bəs Azərbaycanda dronlardan istifadə necə tənzimlənir? Turan-ın bu sualına Dövlət Agentliyinin hüquqşünası Ələsgər Abdullayev cavab verib.
“Prezidentin 292 saylı fərmanı ilə pilotsuz uçuş aparatlarının tənzimlənməsi, idarə edilməsi və digər istifadəsi ilə bağlı bütün səlahiyyətlər Nəqliyyat, Rabitə və Yüksək Texnologiyalar Nazirliyi yanında Dövlət Mülki Aviasiya Agentliyinə verilib.
Dronların gətirilməsi və ölkədə istifadəsi üçün beş dövlət idarəsindən – Rabitə Nazirliyindən, Xüsusi Dövlət Mühafizə Xidmətindən, Dövlət Təhlükəsizliyi Xidmətindən, Dövlət Sərhəd Xidmətindən və Müdafiə Nazirliyindən elektron formada icazə alınmalıdır”, deyə o bildirib.
İnkişaf etmiş ölkələrdə mülki dronlardan istifadə ilə bağlı qadağa yoxdur. Bakıda xüsusi icazə alınması zərurəti antidemokratik tələb kimi qiymətləndirilir. Buna cavabda Abdullayev deyib ki, Azərbaycan xarici təcrübəni kor-koranə təkrar etməməlidir. Müxtəlif ölkələrdə bu məsələlər fərqli həll edilir. Azərbaycanda yeni normativ qaydalar hazırlanır, onlar Nazirlər Kabinetinə təqdim ediləcək.
“Hazırlanmış sənəddə uçuş yüksəkliyindən asılı olaraq pilotsuz aparatlardan istifadə qaydaları müəyyən edilib. Amma, istənilən halda, dronun idxalı və istifadəsi üçün dövlətdən icazə alınmalıdır. Dronda videokamera quraşdırılıb-quraşdırılmaması mühüm deyil. Qaydaların sadələşdirilməsi gözlənilmir”, deyə Abdullayev bildirib.
Qapalı məkanlarda, məsələn, toylar zamanı dron vasitəsilə videoçəkilişə icazə verilir? Bu suala cavabda hüquqşünas deyib ki, qapalı zallarda dronlardan istifadə ümumi qanunvericiliklə tənzimlənir. Qaydalarda drondan qapalı məkanda istifadə ilə bağlı istisnalar yoxdur. Şadlıq evlərində dronlardan istifadə edilirsə, onlardan istifadənin qanuniliyi ilə hüquq-mühafizə orqanları məşğul olmalıdır, Abdullayev belə hesab edir. -0-
Cəmiyyət
-
"Göytəpə" sərhəd dəstəsinin xidməti ərazisində ümumi çəkisi 7 kiloqram 145 qram narkotik vasitəni ölkə ərazisinə keçirməyə cəhd edən İran vətəndaşı 1984-cü il təvəllüdlü Mollayı Meysən Allahbaxış saxlanılıb. Bu barədə yanvarın 31-də Azərbaycan Dövlət Sərhəd Xidməti məlumat yayıb.
-
Yanvarın 31-də saat 12 radələrində Ağcabədi rayonunun Hindarx qəsəbəsində yerləşən evlərdən birində 5 nəfərin ölməsi, 2 nəfərin yaralanması ilə nəticələnən partlayış baş verib. Xəbəri Baş Prokurorluğun mətbuat xidməti yayıb. Faktla bağlı Ağcabədi rayon prokurorluğunda araşdırma aparılır.
-
Şənbə günü Bakıda hava şəraiti dəyişkən buludlu, yağmursuz olacaq. Şimal-şərq küləyi əsəcək. Havanın temperaturu gecə 5-7 dərəcə, gündüz 8-12 dərəcə olacaq. Nisbi rütubət 70-80% təşkil edəcək.
-
Yanvarın 29-da Azərbaycanda bələdiyyə seçkiləri keçirildi. 118 dairə üzrə seçkilərdə 16 mindən çox namizəd iştirak etdi. Mərkəzi Seçki Komissiyasının (MSK) saytında artıq lider namizədlərin adları açıqlanıb. Seçkidən saatlar sonra isə MSK sədri Məzahir Pənahov brifinqdə bildirmişdi ki, 685 bələdiyyənin 413-ü artıq formalaşmış hesab edilir, lider namizədlərin sayı 7 min 791 nəfərdir. Onun sözlərinə görə, bütün dairələrdə seçkilər normal keçib və rəhbərlik etdiyi quruma heç bir şikayət daxil olmayıb. Halbuki, müstəqil namizədlər və ekspertlər seçkilərin gedişatında pozuntuların olduğunu deyirlər.
Rəy yaz