Bakı/18.03.20/Turan: Azərbaycanda həbsdən azad edilən jurnalist Əfqan Muxtarlı martın 18-də Bakı vaxtı ilə gecə saat 1-ə yaxın Berlinə yola düşüb, orada onu ailə üzvləri və bir qrup azərbaycanlı fəal qarşılayıb.
O azad edilməsinin bəzi təfərrüatlarını Turan-ın müxbirinə danışıb.
Ə.Muxtarlının sözlərinə görə, onun azad edilməsi ətrafında müzakirələr ötən ilin payızından gedir. Bu məsələni Almaniya XİN, hökumət və beynəlxalq təşkilatlar fəal şəkildə qaldırırdı. Həbsxanada ona Avropa Şurasının insan hüquqları üzrə komissarı Dunya Miyatoviç, AŞPA məruzəçisi Sunna Evarsdottir baş çəkiblər.
Bununla əlaqədar hələ 2019-cu ilin dekabrında onun buraxılması gözlənilirdi.
O zaman bu, baş vermədi, ancaq ona qarşı münasibət dəyişdi, məhdudiyyətlər qaldırıldı.
“Ancaq məni məhz indi azad edəcəklərini bilmirdim”, - Ə.Muxtarlı deyib.
Onun sözlərinə görə, martın 17-də səhər Suraxanı Rayon Məhkəməsi onun cəzasının dəyişdirilməsi barədə müraciətinə baxdı.
Məhkəmə 77-ci maddəni (cəzanın çəkilməmiş hissəsinin daha yüngül cəza növü ilə əvəzlənməsi) tətbiq edib və 1000 manat (600 dollar) cərimə cəzası təyin edərək onu azad edib.
Məhkəmədən onu Penitensiar Xidmətin avtomobilində aeroporta aparıblar və orada Almaniya səfirliyinin əməkdaşları ilə görüşüb.
Ə.Мухтарлы qeyd edib ki, Berlinə Moskva üzərindən tranzit olaraq gedib.
Görünür, bu məsələnin həllində tələskənlik 17 martın Bakı və Moskva arasında hava əlaqəsinin son günü olması ilə əlaqələndirilib.
Bundan öncə koronavirus pandemiyası ilə əlaqədar Bakıdan Berlinə və AFR-ə tranzitlə getməyin mümkün olduğu digər şəhərlərə müntəzəm reyslər dayandırılıb.
Ə.Muxtarlı jurnalist fəaliyyətilə əlaqədar ona qarşı hər hansı şərtin irəli sürülüb-sürülməməsi barədə suala mənfi cavab verib.
“Xeyr, tənqidi yumşaltmaq, hansısa mövzulara, kiməsə qarşı tənqidə yasaq qoymaq kimi bir şey yoxdur. Mənə deyilən yeganə şey o oldu ki, tənqiddə təhqir və söyüşə yol verməyim. Ancaq mən bunu, ümumiyyətlə, heç kimə qarşı etmirəm”, - o bildirib.
O deyib ki, hazırda səhhəti normaldır.
Jurnalist həbsdə olduğu müddətdə onu dəstəkləyənlərin hamısına - ailə üzvlərinə, dostlarına, həmkarlarına, beynəlxalq təşkilatlara, Azərbaycanda hələ də müstəqil qalan azsaylı media və jurnalistlərə, xarici KİV, müxalifət nümayəndələrinə minnətdarlığını bildirib.
Ə.Muxtarlı bildirib ki, jurnalist araşdırmalarını davam etdirəcək, eyni zamanda Azərbaycanda demokratik dəyişikliklər üçün səyləri dəstəkləyəcək. -06B-
* * *
2020 Mart 18 (Çərşənbə) 02:50:51
Jurnalist Əfqan Muxtarlı həbsdən azad olunaraq Almaniyaya, ailəsinin yanına təyyarəilə uçub
Bakı/17.03.20/Turan: Martın 17-də jurnalist Əfqan Muxtarlının həbsdən azad edildiyi və Almaniyaya yola salındığı bildirilir.
Əfqan Muxtarlının həyat yoldaşı Leyla Mustafayeva Turana onun azadlığa buraxıldığını təsdiq edib. “Mənim özümün heç nədən xəbərim olmayıb. Onun azad olunması haqda vəkili vasitəsilə xəbər tutmuşam. Vəkili Nemət Kərimli ilə Almaniya səfirliyi kontakt qurublar və ona Əfqanın azad olunduğunu deyiblər. Mənim özüm hələ onunla danışmamışam. Azadlığa hansı şərtlər əsasında buraxıldığı haqda hələ məlumatım yoxdur. Yəqin ki özü gələndə hər şeyi danışacaq” - deyə, o bildirib.
Leyla Mustafayeva Əfqan Muxtarlının hazırda Azərbaycandan yolda düşdüyünü və axşam saatlarında Almaniyaya çatacağını gözlədiyini deyib.
Jurnalist Əfqan Muxtarlı 2017-ci il mayın 29-da oturum izni aldığı Gürcüstandan zorla Azərbaycana gətirildiyini deyib.
Məhkəməsində bildirib ki, Tbilisidə saxlanıb, zor tətbiq edilərək sərhədə gətirilib və Azərbaycan tərəfinə təhvil verilib, üstəlik, cibinə 10 min avro pul qoyulub.
Bakıdakı rəsmi qurumlar isə onun sərhədi keçərkən Azərbaycan ərazisində saxlandığını, bu zaman hüquq-mühafizə əməkdaşlarına müqavimət göstərdiyini bəyan ediblər.
Əfqan Muxtarlı hakimiyyət nümayəndəsinə müqavimət göstərməkdə, sərhədi qanunsuz keçməkdə və qaçaqmalçılıqda ittiham olunaraq 6 il həbsə məhkum edilmişdi.
Amnesty International onu vicdan məhbusu kimi tanımışdı. Avropa Parlamenti jurnalstin azad olunmasını istəmışdi. -0-
Cəmiyyət
-
Son günlər ictimaiyyətin diqqəti 2024-cü il noyabrın 8-də Bakıda açılışı keçirilən Qarabağ Müharibəsinə həsr olunmuş yeni Qələbə Abidəsi ətrafında yaranan vəziyyətə yönəlib. Azərbaycanın tanınmış memarı və tarixi memarlıq artefaktlarının tədqiqatçısı Elçin Əliyev abidənin detalları ilə bağlı fotoşəkillər çəkməyə çalışarkən mülki geyimdə olan şəxslərin gözlənilməz maneəsi ilə üzləşib.
-
Şəmkir rayonunda suyun səviyyəsinin ildən-ilə azaldığı Zəyəmçay məişət tullantıları ilə çirkləndirilir, yerli sakinlər bildiriblər. Çayın təmizlənməsi üçün aidiyyatı qurumlara müraciət etsələr də, tədbir görülməyib.
-
Cümə günü paytaxtda hava dəyişkən olacaq. Gecə bəzi yerlərdə yağış yağa bilər. Mülayim cənub-qərb küləyi əsəcək, axşam şimal-qərb küləyinə geçəcək. Havanın temperaturu gecə müsbət 10 +12, gündüz müsbət 13 + 17 dərəcə, rütubət 70-80 faiz olacaq.
-
Dünyanın 28 ölkəsinin 100 universitetini təmsil edən 159 professor və müəllimdən ibarət koalisiya Azərbaycanın ekologiya və təbii sərvətlər naziri və COP29-un prezidenti Muxtar Babayevi 2023-cü ilin iyulundan qeyri-müəyyən müddətə ev dustaqlığında olan alim iqtisadçı və ekologiya fəalı, doktor Qubad İbadoğlunun azadlığa buraxılmasını müdafiə etməyə çağırıb. Azərbaycanın COP29 iqlim konfransına ev sahibliyi etdiyi bir vaxtda göndərilən məktubda doktor İbadoğlunun kritik səhhətinə və onun korrupsiya ilə mübarizəyə və qalıq yanacaq sənayesində şəffaflığın təşviqinə verdiyi töhfələrə istinad edərək, təcili tədbirlər görülməsinə çağırılır.
Rəy yaz