Əfqan Muxtarlı: �Mənim həbsim Gürcüstan hakimiyyətilə razılaşdırılıb�

Bakı/02.03.18/Turan: Bu gün Şəki Apellyasiya Məhkəməsində jurnalist Əfqan Muxtarlının apellyasiya şikayəti üzrə məhkəmə baxışı başlayıb. Şikayətdə Balakəın Rayon Məhkəməsinin jurnalisti 6 il həbsə məhkum edən hökmünə xitam və Əfqan Muxtarlıya bəraət verilməsi istənilir. Məhkəmə baxışı qismən məhkəmə istintaqı ilə keçirilir.

Vəkil Nemət Kərimli bildirib ki, jurnalist ifadəsində Gürcüstanda oğurlanması, Azərbaycan sərhəd-keçid məntəqəsində təhvil verilməsi, cibinə 10 min avro pul qoyulması barədə məlumat verib. O hesab edir ki, Azərbaycan hökumətinin sifarişi və Gürcüstan hökumətinin razılığı ilə oğurlanıb.

"Mən Azərbaycan ordusuna ayrılan maliyyə vəsaitinin mənimsənilməsi, Əliyevlərin Göygölü zəbt etməsi, villaları, ailənin Gürcüstandakı biznes fəaliyyəti haqda silsilə araşdırmalar aparmışam. Bu səbəbdən hesab edirəm ki, şəxsən İlham Əliyevin göstərişi ilə həbs olunmuşam", -o qeyd edib.

Cinayət işi üzrə Qafur Məmmədov adlı zərərçəkən məhkəməyə gəlmədiyindən proses martın 14-dək təxirə salınıb.

Jurnalist Əfqan Muxtarlı 2017- ci il mayın 29-da oturum izini aldığı Gürcüstandan zorla Azərbaycana gətirildiyini deyir. Jurnalist Cinayət Məcəlləsinin 315.2-ci maddəsi ilə hakimiyyət nümayəndəsinə müqavimət və ya zor tətbiq etməkdə ittiham olunub.

Bundan başqa ona qarşı 318.1, 206.1-ci maddələr - sərhəddi qanunsuz keçmə və qaçaqmalçılıq ilə ittiham irəli sürülüb.

Bakıda rəsmi qurumlar iddia ediblər ki, Ə. Muxtarlı sərhəddi qanunsuz keçərkən Azərbaycan ərazisində saxlanılıb və bu məsələnin siyasiləşdirilməsidüzgün deyil.

Ə.Muxtarlı bu ilin yanvarında məhkəmənin qərarı ilə 6 il həbs cəzası alıb. O, ittihamları rədd edərək həbsini "siyasi sifariş" adlandırıb.-06B-