Əfqan Sadıqov aclıq elan edib

Bakı/04.11.20/Turan:  “Azel TV" saytının baş redaktoru Əfqan Sadıqov noyabrın 4-dən aclıq aksiyasına başlayıb. Bu barədə jurnalistin həyat yoldaşı  Sevinc Sadıqova bildirib.

Onun sözlərinə görə,  Ə. Sadıqovun  aclıq aksiyasına başlamasına səbəb noyabrın 3-də Bakı Ağır Cinayətlər Məhkəməsində onun barəsində  7 il həbs cəzası kəsilməsinə etiraz etməsidir.

S. Sadıqova  deyib ki, Ə. Sadıqov bu hökmü ədalətsiz hesab edir.

“Mən də  ədalətsiz hesab edirəm. Ortada heç bir hədə qorxu , şantaj xarakterli nə yazı var.  Heç bir şey yoxdur ortada. Mən onun sonadək aclıq aksiyası edəcəyinə inanıram.  Həqiqətən o aclığı davam etdirəcək. Aclığın 20-ci günündən sonra quru aclığa keçəcək ədalət bərpa olunana qədər”, - o qeyd edib.

 S.Sadıqova  Ə. Sadıqovun aclıq aksiyası ilə bağlı  Azərbaycanın insan hüquqları müvəkkili (ombudsman) və Beynəlxalq Qırmızı Xaç Komitəsinə müraciət etdiyini deyib. Bu məsələ ilə bağlı Ədliyyə Nazirliyinin  Penitensiar Xidmətindən  hələlik şərh almaq mümkün olmayıb.

S. Sadıqova  hökmdən apellyasiya şikayəti veriləcini bildirib.

Ə.Sadıqov mayın 13-də saxlanılıb və Binəqədi məhkəməsi onu 4 ay müddətinə həbs edib. O, xəbərfakt.az nəşrinin redaktoru ilə Sakit Muradov ilə birlikdə 10 min manat rüşvət alarkən saxlanılıb. Lakin S.Muradovu həbs etməyiblər.

Noyabrın 3-də Bakı Ağır Cinayətlər Məhkəməsi Ə.Sadıqovu 7 il, S.Muradovu isə 3 il sınaq müddəti olmaqla 5 il müddətinə şərti olaraq azadlıqdan məhrum edib.

Əfqan Sadıqov qalmaqallı yazıları ilə tanınır. Həmin yazılarda bəzi məmurların korrupsiya və kriminala bağlı olduğu iddia edilib. “Siyasi Məhbusların Azadlığı Uğrunda” İttifaq onu siyasi məhbus elan edib. –06D-