"Ekofront" Söyüdlüdəki su anbarını ölkənin bir hissəsi üçün təhlükə adlandırıb

Bakı/24.06.23/Turan: Azərbaycanın "Ekofront" müstəqil ictimai təşkilatı hökumət komissiyasının Gədəbəy rayonunun Söyüdlü kəndi yaxınlığında kimyəvi tullantıların axıdıldığı su anbarının təhlükəsiz olması haqqında iddiasını təkzib edən bəyanat yayıb.

"Ekofront" toksik tullantıların saxlanılması üçün yaradılmış gölməçənin zəhərli tullantıların torpağa və yeraltı sulara sızmasının qarşısını almaq iqtidarında olmadığını hesab edir. "Anbar primitiv izolyasiya materialları ilə belə izolyasiya olunmayıb və pis idarə olunub. Yalnız bənd izolyasiya olunub. Anbar Azərbaycan ərazisinin bir hissəsi üçün ciddi ekoloji təhlükə yarada bilər", təşkilat belə hesab edir.

"Ekofront" hökuməti siyasi oyunlarda və ittihamlarda iştirakdan çəkinərək, səmərəli və məsuliyyətli davranmağa çağırıb.

Təşkilat anbar ərazisində axan dərələrin suyunu analiz etmək istəyib, lakin polis nümunələri onların əlindən alıb.

"Ekofront" Ekologiya və Təbii Sərvətlər Nazirliyindən, həmçinin qızıl hasilatı kombinatının rəhbərliyindən bu təşkilatın ekspertlərinin Gədəbəy rayonunda ekoloji vəziyyətin monitorinqində iştirakını təmin etməyi tələb edir.

İyunun 20-də Azərbaycanda polis "Gədəbəy" yatağında qızıl hasilatının tullantılarının axıdılması üçün süni su hövzəsi yaradılmasına etiraz edən Gədəbəy rayonunun Söyüdlü kənd sakinlərinin aksiyasını dağıtmaq üçün xüsusi vasitələrdən istifadə edib. Etirazçılar arasında xəsarət alanlar var, beş nəfər həbs olunub, bir yaşlı qadın isə cərimə olunub.

İyunun 21-də kənd sakinləri yenidən etiraz aksiyasına çıxaraq, su hövzəsinin tikintisinə son qoymağı və saxlanılanları azad etməyi tələb ediblər. Hakimiyyət qızıl yatağının tullantılarının ətraf mühitə təsirinin qiymətləndirilməsi üzrə komissiya yaradıldığını deyib. Hökumət komissiyası kombinatın işinin heç bir ziyanı olmadığını bildirib. İyunun 22-si səhər saatlarından etibarən polis kəndə girişi məhdudlaşdırıb, Söyüdlüyə yalnız burada qeydiyyatda olan insanları buraxır.

"Ekofront" bir qrup ictimai ekoloji fəalın, təbiətin mühafizəçilərinin qurduğu təşkilatdır. Təsisçisi Cavid Qaradır. 06D