Ekspertlərin fikrincə, azərbaycanlı əsgər erməni kəşfiyyatı tərəfindən oğurlanıb

Azərbaycan milli ordusunun əsgəri Firuz Fərəcovun özünün əsir düşməsi barədə Ermənistan Müdafiə Nazirliyinin və KİV-nin məlumatları həqiqətəuyğun deyil. Əsgər erməni kəşfiyyat qrupu tərəfindən oğurlanıb. Avqustun  1-də Reportyorların Azadlıq və Təhlükəsizlik İnstitutunun (RATİ) Media Mərkəzində hərbi ekspertlərin iştirakı ilə keçirilən “dəyirmi masa”da ümumi fikir belə olub. 

    Xatırladaq ki, F.Fərəcov iyulun  26-da cəbhənin Tovuz istiqamətində əsir götürülüb.  “Hərbi jurnalistlər” İctimai Birliyinin rəhbəri Üzeyir Cəfərovun sözlərinə görə, F.Fərəcovun ağ bayraqla təslim olması yalan və uydurmadır.

    Onun sözlərinə görə, əsgərin əsir düşmək üçün heç bir motivi olmayıb, o, vətənpərvərlik ruhunda böyüyüb, əsgəri xidmətin çətinliklərindən qorxmayıb, peşəkar hərbçi olmaq istəyirmiş. Bundan əlavə, əsirlikdən iki gün əvvəl telefonla qohumları ilə danışıb və qarşıdakı bazar günü onların gəlişini gözləyirdi. 

    Əsgərin əsir düşmə şəraiti Hərbi Prokurorluq tərəfindən araşdırılır. Bununla yanaşı Ü.Cəfərov diqqəti əsir  düşən əsgərlərə Azərbaycanda pis münasibətin olması probleminə yönəldib.

    Belə ki, bəzi hərbi əsirlər azadlığa buraxıldıqdan sonra dövlətə xəyanətdə və hərbi sirrin yayılmasında ittiham olunaraq uzun müddət məhkum edilib. Bu ona gətirib çıxarıb ki, bir neçə nəfər Azərbaycana qayıtmaqdan imtina edib və üçüncü ölkəyə gedib. 

    Ü.Cəfərovun fikrincə, sıravi əsgərlər hərbi sirri bilmirlər və onları mühakimə etmək düzgün deyil, üstəlik hərbçilər öz xoşları ilə əsir düşmürlər. 

    Qarabağ və Əfqanıstan müharibəsi veteranı Tərlan Eyvazov da dövlətin vətəndaşların taleyinə münasibətinin vacibliyini qeyd edib.  O, İsraili misal çəkərək deyib ki, burada əsgərlərə öz həyatlarını qorumaq naminə hərbi sirri açmaq tövsiyə olunur. 

    “Azərbaycan ordusu” qəzetinin (Müdafiə Nazirliyinin orqanı)  baş redaktor müavini İbrahim Rüstəmov qeyd edib ki, onun məlumatına görə, F.Fərəcov özünü yaxşı əsgər kimi tanıdıb. Əsgər özü ön cəbhədə olmağı xahiş edib.

    Digər ekspert, polkovnik-leytenant Səməd Səmədzadə bildirib ki, heç bir azərbaycanlı hərbçi özü əsir düşməyib. Çox zaman əsgər ehtiyat tədbirlərinə əməl etmədiyinə və məsuliyyətsizliyə görə əsir düşür.

    Hüquq müdafiəçisi Ələkbər Məmmədov da əsir düşən əsgərlərə qarşı cinayət təqiblərinin yolverilməz olduğunu bildirib. 

    “Dəyirmi masa” iştirakçıları dövlət orqanlarının diqqətini bu məsələyə yönəltmək qərarına gəliblər.

    ATƏT-in Minsk Qrupu həmsədrlərinə, Beynəlxalq Qırmızı Xaç Komitəsinə, Azərbaycan  Əsir və İtkin Düşmüş, Girov Götürülmüş Vətəndaşlar üzrə Dövlət Komissiyasına və KİV-ə müraciət qəbul ediblər. Müraciətdə deyilir: 

    “ATƏT-in Minsk Qrupunun hörmətli həmsədrləri, biz, Azərbaycan ictimaiyyətinin nümayəndələri sizə müraciət edərək xahiş edirik ki, bu gəncin taleyinə biganə qalmayasınız və onun azad edilməsi üçün səylərinizi əsirgəməyəsiniz. 

    Biz Beynəlxalq Qırmızı Xaç Komitəsini də israrla öz səlahiyyətləri çərçivəsində hərbi əsir Firuz Fərəcova baş çəkməyə və onun tezliklə azad edilməsi üçün  mümkün olan bütün addımları atmağa çağırırıq.  

    Bununla yanaşı, Azərbaycan Respublikasının Əsir və İtkin Düşmüş, Girov Götürülmüş Vətəndaşlar üzrə Dövlət Komissiyasına müraciət edərək bu işdə maksimum fəallıq göstərməyə və bütün beynəlxalq strukturlarla bu istiqamətdə işi koordinasiya etməyə çağırırıq. 

    Biz həmçinin KİV-i bu mövzuda yoxlanmamış, əsassız, həmçinin şəxsi və ailə xarakterli məlumatlar yaymamağa çağırırıq”.--06C-