Elçin Sadıqov güc nazirlərinə müraciət edib

Vəkil Elçin Sadıqov Daxili İşlər Nazirliyi (DİN) Baş Mütəşəkkil Cinayətkarlığa Qarşı Mübarizə İdarəsinin (BMCQMİ) əməkdaşları tərəfindən hədə və şantaja məruz qalması ilə bağlı Baş Prokurorluq, DİN və Dövlət  Təhlükəsizlik Xidmətinin rəhbərlərinə müraciət edib.

Vəkil bildirib ki, noyabrın 2-də səhər jurnalist Fikrət Fərəməzoğlunun işi üzrə sənədlərə görə BMCQMİ-yə gedib. Lakin nəzarət-keçid məntəqəsində müstəntiq ona deyib: “Sən və Fikrət Fərəməzoğlunun həyat yoldaşının bizim idarənin haqqında mənfi məlumat yayması sizə baha başa gələcək”. Bundan sonra İnternetdə vəkil və jurnalistin xanımı arasında guya sevgi münasibətlərinin olmasına dair məlumatlar yayılıb.

Sonra Facebook-da vəkilin adından saxta profillər açılıb.

Belə ki, həmin gün reytinqinfo.az  saytında “Fikrət Fərəməzoğlunun işində sevgi macəraları. Jurnalistin xanımı və vəkil arasında gizli əlaqələr, sensasion faktlar, şok yazışmalar”  başlıqlı məqalə yer alıb.

Lakin sonradan məqalə saytdan çıxarılıb. “Reytinq” qəzetinin baş redaktoru Afiq Mirzəbəyli bildirib ki, redaksiyanın yazıya aidiyyatı yoxdur və sayta haker hücumu olub. 

E.Sadıqov yazıb ki, təxminən onillik vəkil fəaliyyəti ərzində  jurnalistlər, siyasi və ictimai xadimləri müdafiə etdiyinə görə dəfələrlə təzyiqlərə məruz qalıb. Ancaq son vaxtlar hədə və təzyiqlər artıb. Hətta iş fiziki təzyiqlərə qədər gəlib çatıb. Belə ki, avqustun 27-də məhkəmədə BMCQMİ-nin əməkdaşları vəkilə açıq şəkildə hədə-qorxu gəliblər. İclasdan sonra vəkil görüb ki, avtomobilin ötürmə qutusunda bolt açılıb və oradan bütün yağ axıb. “Kənar müdaxilə olmadan bunu etmək mümkün deyil”, - E.Sadıqov qeyd edib.

Nəhayət, noyabrın  3-də vəkilin doğulduğu Göygöl rayonunda onun qohumlarını dindirməyə başlayıblar.

“Rayonun polis şöbəsinin cinayət axtarışı bölməsinin əməkdaşı qardaşımı çağıraraq mənim ailəm, uşaqlarım, harada yaşadığımız, harada qeydiyyatda olduğumuz barədə məlumat tələb edib. Qardaşım cavab verməkdən imtina edib və bunu mənə bildirib. Sonra özüm polis əməkdaşı ilə telefonla danışdım. O dedi ki,  sorğu gəlib və buna görə də ətraflı məlumat lazımdır”, - vəkil Turan-a bildirib.

E.Sadıqov hesab edir ki, bu, noyabrın 2-də BMCQMİ-də hədələnməsilə bağlı olan məsələdir. “Başa düşmürəm niyə bu sualları mənə vermirlər, qohumlarımı narahat edirlər? Əlbəttə ki, bu, mənim yaxınlarıma psixi təzyiq göstərmək üçün edilir”, - o vurğulayıb. 

Oktyabrın 25-də onun müdafiə etdiyi fəal Qiyas İbrahimov 10  il həbs cəzası alıb. Bundan sonra vəkilin elektron ünvanına viruslar daxil olmağa başlayıb, mobil telefonu bir neçə saatlığa bloklanıb. Nəhayət, noyabrın 2-də BMCQMİ-də onu açıq şəkildə hədəlyiblər.

Vəkil xatırladır ki, Konstitusiyanın 61-ci maddəsi  azad vəkil fəaliyyətinə zəmanət verir. E.Sadıqov ümidvar olduğunu bildirib ki, güc qurumlarının rəhbərləri ona  qarşı hədə və təzyiqlərin araşdırılması üçün lazımi addımlar atacaq.

Media Hüququ İnstitutu (MHİ) bəyanatla çıxış edərək vəkil Elçin Sadıqov və onun həyat yoldaşı vəkil Zibeydə Sadıqovaya qarşı təzyiq kampaniyasından narahatlığını bildirib. Bəyanatda deyilir ki, MHİ komandasının fəal üzvləri olan hər iki vəkil ifadə və mətbuat azadlığı hüququnun reallaşmasına görə zərər çəkən şəxsləri müdafiə edirlər. 

Noyabrın 2-də  Facebook-da vəkilin və onun xanımının qanunsuz əldə edilmiş şəxsi fotoları yayılıb. “Vəkillərə bu cür görünməmiş təzyiqlər bir daha göstərir ki, ölkədə ədalət mühakiməsi ilə bağlı böyük problemlər var.  Hökumət təkcə hakimlərin, prokurorların və müstəntiqlərin yox,  vəkillərin də hüquqlarını müdafiə etməyə borcludur”, MHİ-nin bəyanatında qeyd olunur.

Sonda E.Sadıqova və digər vəkillərə qarşı qanunsuz əməllərin təcili və effektiv araşdırılmasına çağırılır.

Turan-ın BMCQMİ-dən şərh almaq cəhdləri nəticəsiz qalıb. —06В—