Əli Həsənov tələbələri pis təsirdən qorumaq istəyir

Dünən Türkiyənin Bodrum şəhərində “Azərbaycanlıların xarici ölkələrin cəmiyyətlərinə inteqrasiyası: hazırki vəziyyət və perspektivlər” mövzusunda forum başa çatıb.

İclasda çıxış edən Diaspor ilə İş üzrə Dövlət Komitəsinin sədri Nazim İbrahimov bildirib ki, dövlət siyasətinin prioritet istiqaməti həmvətənlərimizin hüquq və azadlıqlarının müdafiəsidir. Onun sözlərinə görə, bir çox ölkələrdə həmvətənlərimizin hüquqlarının pozulması halları baş verir və azərbaycanlıların hüquqi maarifləndirilməsi gücləndirilməlidir. Uğurlu iş kimi o, Gürcüstandakı azərbaycanlıların hüquq və azadlıqlarının müdafiəsi üzrə bir sıra layihələri qeyd edib.

Prezident Administrasiyasının ideoloji şöbəsinin müdiri Əli Həsənov xaricdə təhsil alan tələbələri diaspor təşkilatları ilə fəal əməkdaşlığa çağırıb.

O, azərbaycanlı tələbələrə “mənfi xarici təsirlə” bağlı narahatlığını ifadə edib və “bu sahədə müvafiq tədbirlər görülməsi” zərurətini vurğulayıb. Lakin Həsənov hansı təsirdən söhbət getdiyini və hansı tədbirlərin görülməli olduğunu dəqiqləşdirməyib. 

“Biz dünya azərbaycanlılarının birliyinə nail olmaq, diasporu daha güclü və mütəşəkkil qüvvəyə çevirmək istəyirik”, deyə Əli Həsənov bildirib.

İclasın yekunlarına görə, Forum iştirakçıları Birgə Bəyanat qəbul ediblər. Bəyanatın 25 maddəsində bütün dünya üzrə diasporun birləşməsi “Azərbaycan Diasporunun İnformasiya Mərkəzi” şəbəkəsinin yaradılması, beynəlxalq “Xocalıya qarşı ədalət” kampaniyasına dəstək və s. məsələlər əksini tapıb. -02D-