BP, SOCAR və Total TAP boru kəməri aktivlərinin yarısına nəzarət etmək istəyir

TAP (Transadriatik boru kəməri) konsorsiumu və “Şahdəniz” qaz-kondenstat yatağının işlənməsi üzrə tərəfdaşlar (BP, SOCAR və Total) Azərbaycan qazının Avropaya yekun ixrac marşrutu seçilənə qədər layihənin maliyyələşdirilməsi üzrə saziş imzalayıblar. Bu barədə TAP boru kəməri konsorsiumunun bu gün yaydığı press-relizdə bildirilir. 

Sazişə əsasən, ayrılmış vəsait layihə çərçivəsində boru kəmərinin marşrutu üzrə yekun qərarın qəbuluna – 2013-cü ilin ortalarına qədər həyata keçirilməsi planlaşdırılan müxtəlif işlərə yönləndiriləcək. 

Sazişdə həmçinin “Şahdəniz”in işlənməsi üzrə tərəfdaşların TAP layihəsində 50%-dək pay əldə etməsi imkanı nəzərdə tutulur. 

TAP direktoru Kjetil Tunqlandın sözlərinə görə, imzalanmış saziş TAP-ın “Şahdəniz”in işlənməsi üzrə konsorsiumla əməkdaşlığı möhkəmləndirəcək. O, həmçinin əlavə edib ki, TAP bu əməkdaşlığın müsbət nəticə verəcəyindən əmindir.

BP-Azerbaijan şirkətindən bu məlumatı Turana şərh edərkən bildiriblər ki, ““Şahdəniz” layihəsinin əsas tərəfdaşları – BP, SOCAR və Total Azərbaycan qazının Avropaya nəql olunacağı hər bir nəqliyyat seqmentində - Cənubi Qafqaz boru kəməri, Trans Anadolu və TAP/Nabucco-West-də paya sahib olmaq istəyirlər”. Buna görə layihənin uğurlu olacağı halda imzalanmış saziş TAP aktivlərinin yarısına nəzarət etmək imkanı verir, deyə Turan-ın həmsöhbəti qeyd edib.

* TAP “Şahdəniz-2” layihəsi çərçivəsində qazın Yunanıstan və Albaniyadan Adriatik dənizi vasitəsilə İtaliyanın cənubuna və oradan Qərbi Avropaya nəqli üçün nəzərdə tutulur. TAP səhmdarları İsveçin EGL (42,5%), Norveçin Statoil (42,5%) və Almaniyanın немецкая E.ON Ruhrgas (15%) şirkətidir. TAP-ın ümumi uzunluğu təqribən 800 km təşkil edir. TAP boru kəmərinin ilkin gücü ildə 10 mlrd. kubmetr təşkil edəcək, gələcəkdə ildə 20 mlrd. kubmetrə qədər artırmaq imkanı nəzərdə tutulur.

2012-ci il fevralın əvvəllərində “Şahdəniz” konsorsiumu TAP-ı Azərbaycan qazının İtaliyaya ixracı üçün prioritet marşrut seçib. -0-