Əlilliyə görə iki il yarım

Bakı/08.02.18/Turan:Şirvan Apellyasiya Məhkəməsində ötən il iyunun 28-də Saatlı rayonunun Dəllər kəndində baş vermiş dəhşətli qəza haqqında iş üzrə dinləmələr keçirilib. Həmin vaxt VAZ 2106 və Mercedes markalı iki maşının toqquşması nəticəsində Jiqulinin sərnişini Mirzəağazadə İlkin, ölümcül xəsarətlər alıb. Amma həkimlərin səyləri və bahalı dərmanlar sayəsində iki ay komada qalan 28 yaşlı oğlan komadan çıxa bilib. O, məhkəmədə zərərçəkmiş və iddiaçı kimi iştirak edib.

Mirzəağazadə onun içərisində olduğu maşının sürücüsü Ramil Cəlilovu cəzasını məntəqə tipli cəzaçəkmə müəssisəsində çəkməklə və həmin müddətə nəqliyyat vasitəsi idarə etmək hüququndan məhrum etməklə, 1 il 4 ay müddətinə, Mercedes sürücüsü Mürsəl Qurbanovu cəzasını məntəqə tipli cəzaçəkmə müəssisəsində çəkməklə və həmin müddətə nəqliyyat vasitəsi idarə etmək hüququndan məhrum etməklə, 1 il 10 ay müddətinə məhkum etmiş Saatlı rayon məhkəməsinin qərarından apellyasiya şikayəti verib.Hər ikisi CM-in 163 saylı maddəsi ilə mühakimə olunub.

Zərərçəkmişin fikrincə, Qurbanov barəsində hökm həddindən artıq yüngüldür, belə ki, hadisə günü o, təxminən 140 km/saat sürətlə zərərçəkmişin içində olduğu maşına vurub. Bu zaman minimum sürətlə hərəkət edən Jiquli təxminən 20 metr kənara atılıb, amma işə baxan Saatlı Polis İdarəsinin müstəntiqi Xəyal Abbasov istintaq materiallarında Mercedesin 70 km/s sürətlə hərəkət etdiyini göstərib, beləliklə, hadisənin sürücü vəsiqəsi belə olmayan təqsirkarının cəzasını yüngülləşdirib. Mirzəağazadə apellyasiya şikayətində Qurbanovun cəza müddətini 4 il azadlıqdan məhrumetməyə qədər artırmağı xahiş edib. Bundan başqa, zərərçəkmiş məhkəmədən Ramil Cəlilovu məsuliyyətdən azad etməyi xahiş edib, belə ki, istintaqın rəyinə baxmayaraq, o, hadisədə təqsirli deyil, həm də onlar barışıblar. Birinci instansiya məhkəməsinin də razılaşdığı istintaqın versiyasına görə, yolda qəza vəziyyətini Qurbanovun maşınının önünə çıxan və toqquşmaya səbəb olan Cəlilov yaradıb. Birinci instansiya məhkəməsinin hökmünü ləğv etmək xahişi ilə Cəlilov özü də apellyasiya şikayəti verib.

Saat 10:00-a təyin edilmiş proses Rafiq Cəfərovun sədrliyi ilə açıq elan edilib və hakim müttəhimlərin anket məlumatlarını elan edərək, Saatlı rayon məhkəməsinin qərarını oxuyub. Daha sonra zərərçəkmişin vəkili Azər Rəsulov söz istəyib, o bildirib ki, istintaq zamanı və birinci instansiya məhkəməsi tərəfindən müştərisinin hüquqları pozulub: "Təəssüf ki, burada da bizim hüquqlarımız pozulub. Bizi hazırlıq iclasına çağırmayıblar, nəticədə mən müəyyən vəsatətləri verə bilməmişəm. Rayon məhkəməsində məhkəmə təhqiqatı zamanı hadisə şahidlərinin əksəriyyəti dəvət olunmayıb - altı şahiddən cəmi ikisi məhkəmə istintaqına cəlb edilib. Amma məhkəmədən kənarda qalan şahidlər qanun pozuntusunu idarə etdiyi avtomobilin sürəti həddindən artıq yüksək olan Qurbanovun törətdiyini təsdiq edə bilərdilər. Amma, buna baxmayaraq, istintaq iş materiallarında avtomobilin sürətini 70 km/s civarında göstərib. Müştərim iki ay komada qalıb, amma müstəntiq bir dəfə belə onunla maraqlanmayıb. Qurbanov da zərərçəkmişlə maraqlanmayıb, müalicəyə 20 min manatdan çox pul getdiyini nəzərə alsaq, 550 manatdan başqa, maddi yardım da etməyib. O, indi də peşman deyil. Buna görə sizdən onun barəsində hökmü 4 il azadlıqdan məhrumetmə ilə əvəz etməyi xahiş edirəm". Vəkilin nitqindən sonra dövlət ittihamçısı Elmar Məmmədov zərərçəkmişdən Cəlilova qarşı iradı olub-olmadığını soruşub, o, buna inkar cavabı verib: "O, təqsirli deyil. Həm də o, mənə 850 manat ölçüsündə ziyanı ödəyib". Bundan sonra prokuror Cəlilova apellyasiya şikayəti verməsinin səbəbi haqqında sualla müraciət edib. Müttəhim cavab verib ki, o, təqsirli deyil. Buna cavabda dövlət ittihamçısı deyib: "Amma istintaqda və birinci instansiya məhkəməsində təqsirini etiraf etmisən". Daha sonra məhkəmə Mirzəağazadənin Cəlilova qarşı iradı olmaması barədə bəyanat yazıb.

Fasilədən sonra məhkəmə müzakirələrə keçib. Prokuror Cəlilovun istintaqda özünü təqsirli bildiyini, məhkəmədə onun təqsirinin sübuta yetirildiyini qeyd edərək, məhkəmədən onun apellyasiya şikayətini təmin etməməyi xahiş edib. O, həmçinin qeyd edib ki, Qurbanov barəsində hökmü sərtləşdirməyə ehtiyac yoxdur, birinci instansiya məhkəməsinin hökmü əmələ uyğundur. O, məhkəmədən Saatlı rayon məhkəməsinin qərarını qüvvədə saxlamağı xahiş edib.

Vəkil Rəsulov qeyd edib ki, Cəlilov istintaqda ifadələri oxumadan imzalayıb, rayon məhkəməsində isə o, özünü təqsirli bilməyib. O, həmçinin qeyd edib ki, müştərisi Mirzəağazadə indiyədək işləmək qabiliyyətinə malik deyil, ömürlük əlil olub və Qurbanovun cəmi 1 il 10 ay müddətinə azadlıqdan məhrum edilməsi ədalətlilik prinsipinin pozulmasıdır.

Qurbanovun vəkili öz növbəsində bildirib ki, zərərçəkmiş tərəfin tələbi ədalətsizdir, belə ki, müvəkkili qəzanı qəsdən törətməyib: "Onun əmlakına da ziyan dəyib. Bundan başqa, işdə ağırlaşdıcı hallar yoxdur, yalnız yüngülləşdirici hallar var. Müvəkkilim evlidir, azyaşlı uşaqları var və o, ziyanı qismən ödəyib. Məhkəmədən hökmü qüvvədə saxlamağı xahiş edirəm".

Bundan sonra məhkəmə müşavirəyə çəkilib, qayıtdıqdan sonra hökmü elan edib. Hökmə əsasən, Cəlilovun şikayəti təmin edilməyib, Mirzəağazadənin şikayəti isə qismən təmin edilib: iddiaçı cavabdeh Cəlilovla barışığına görə məhkəmə sonuncuya qarşı bütün ittihamları ləğv edib. Qurbanov barəsində birinci instansiya məhkəməsinin qərarı dəyişdirilib - məhkəmə onu iki il yarım müddətinə azadlıqdan məhrum edib.

http://www.turan.az/ext/news/2017/7/free/Social/az/64170.htm

http://www.turan.az/ext/news/2017/7/free/Social/az/64490.htm