Media-icmalı 08.02.18

Bu il aprelin 11-nə təyin edilmiş növbədənkənar prezident seçkilərində prezident İlham Əliyevin namizədliyi, ölkə iqtidarına münasibət, ət istehsalındakı problemlər bugünkü (08 fevral, 2018-ci il) medianın aparıcı mövzularındandır...

Fəslin fərq etmədiyi namizəd

"Azərbaycan" qəzeti "Yeni Azərbaycanın və müstəqillik kursunun etibarlı təminatçısı" sərlövhəli məqalədə "Yeni Azərbaycan" Partiyasının fevralın 8-də keçirilməsi gözlənilən qurultayında prezident İlham Əliyevin prezidentliyə namizədlyinin irəli sürüləcəyini dəyərləndirir.

Müəllifə görə, ölkədə prezident seçkilərinin apreldə və oktyabrda keçirilməsi heç nəyi dəyişmir, belə ki, İlham Əliyevin yenidən prezident seçiləcəyinə şübhə yoxdur: "Əlbəttə, Azərbaycan vətəndaşlarının cənab İlham Əliyevə yüksək etimadı danılmazdır. Hər bir ölkə vətəndaşı bilir və şahiddir ki, dövlət başçısının bütün fəaliyyəti vətəndaşların sosial rifahının yüksəlməsinə, yoxsulluğun azaldılmasına, sabitliyə nail olunmasına yönəlib" deməklə müəllif İlham Əliyevin yenidən prezident seçilməsinin alternativsizliyini izah etmək istəyir.

Müəllif ölkədə islahatların həyata keçirilməsində, ölkənin sürətlə inkişaf edən ölkələr arasında olmasında, inkişaf və vətəndaş həmrəyliyi parametrlərinə görə nümunəvi ölkələrdən biri sayılmasında İlham Əliyevin xüsusi rolunun olduğunu bildirir: "Əlbəttə ki, Azərbaycandakı həmrəylik və sabitliyin mənbəyi xalqın iradəsidir, xalq-iqtidar birliyidir. Prezident İlham Əliyevin yürütdüyü siyasətin mərkəzində Azərbaycan vətəndaşının maraqları dayanır".

Yazı müəllifi prezident İlham Əliyev dövlət maraqlarını qətiyyətlə dəstəklədiyi üçün xalqın da İlham Əliyevi dəstəklədyini deyərək siyasətçilərə etimad indeksi üzrə Azərbaycanın 137 ölkə arasında 20-ci yeri tutduğunu vurğulayır.

Müəllifə görə, bu göstərici ölkədə iqtidarla xalq arasında etimadın təsbit olunması, İ.Əliyevin siyasətinə əhalinin və beynəlxalq ictimaiyyətin verdiyi qiymətdir.

Məqalədə deyilir ki, bu etimadın daha bir nümunəsi hələ keçənilki sorğularda rəyi soruşulanların 85% -nin İlham Əliyevə səs verəcəyini bildirməsidir: "Son 14 ildə prezident İlham Əliyevin apardığı uğurlu siyasət nəticəsində xalq-iqtidar birliyi daha da dərinləşib. Adətən böhran zamanı digər ölkələrdə ictimai-siyasi kataklizmlər olduğu halda Azərbaycanda sabitlik nəinki qorunub, həm də möhkəmlənib. Məhz bu sabitliyin nəticəsidir ki, nəinki Azərbaycan xalqı, həm də xarici investorlar iqtidarın siyasətinə etimad göstərirlər".

Müəllif hesab edir ki, aprel ayının 11-də xalq İ.Əliyevə səs verməklə işıqlı sabaha, davamlı tərəqqiyə, yüksələn rifaha səs verəcək.

Xalqın özündən saymadığı ...

"Azadlıqinfo.az" saytında isə "Qohum-qudalardan ibarət hakimiyyət siyasi aləmi başa düşməz" sərlövhəli məqalə oxumaq olar.

Müəllif indiki iqtidarın idarəçiliyinin xalqa uğursuzluq gətirdiyini iddia edir, həm də iqtidarın düşünülməmiş addımlar atdığını bildirir: "Bu səbəbdən də bunu hiss edən ölkə ictimaiyyəti bu iqtidarı özününkü bilmir, özündən biri hesab eləmir, ona güvənmir".

Müəllifə görə, elə bil ki, bu hakimiyyət Azərbaycana Moskvadan, Parisdən boylanır, elə bil ki, ayaqları respublika torpaqlarına dəymir. "Elə bil ki, ölkə boyu "qul bazarları"nın sayının artmasını görmür və belə bir zamanda əmək qabiliyyətli insanların 95 faizinin işlə təmin edilməsi cəfəngiyyatını uydurur".

Yazı müəllifi deyir ki, xalqın, cəmiyyətin sabahı naminə özünü cəmiyyətdəki işsizin, acın, hüquqsuzun yerinə qoyan idarəçilik formalaşmalıdır.

Müəllif vurğulayır ki, bu etimadsızlığın nəticəsidir ki, insanlar doğmalarının müalicəsi üçün üzləri gələn hər bir kəsdən yardım istəyirlər, amma hakimiyyətdən bunu ummurlar və bu xalqın hakimiyyətə bəstələdiyi "ölüm rekviyemidir".

Müəllif hüquqsuzluğun baş alıb getdiyi ölkədə iqtidarın hüquq bolluğundan danışmasını primitivlik adlandırır: "Görün, iqtidar nümayəndələri nə qədər primitivdirlər ki, çıxış və müsahibələrində xalqın bol-bol hüquqları var deyirlər, heç olmasa, xariciləri özünüzə güldürməyin, heç olmasa, demokratik institutlarla lal oyunu oynayın. Məgər, sizin üçün hüquq və azadlıqlar buğda zəmisidir ki, zəmidəki dənin artıqlığından və ya azlığından danışasınız?"

Müəllif vurğulayır ki, hər bir ölkədə hüquq və azadlıqlar ya var, ya da bu hüquq və azadlıqlar yoxdur, odur ki, bu hüquqların azlığı və ya çoxluğu anlayışı yoxdur.

Müəllifə görə, ağzından çıxardığı sözü qulağı eşitməyən bu iqtidar xalq üçün ən ağır, ən üzücü bir problemə çevrilib, odur ki, xalq bu hakimiyyəti öz ümidsizliyinin, uğursuzluğunun səbəbkarı bilməkdə haqlıdır.

Məqalə müəllifinə görə, mövcud iqtidar idarəçilikdən uzaqdır, beynəlxalq təşkilatların danlaq, irad, inamsızlıqlarına baxmayaraq, hakimiyyətdən yapışması ölkənin yeraltı və yerüstü varına sahib olmaq istəyilə bağlıdır.

Müəllif hesab edir ki, Azərbaycan gerçəkliyində düşüncə, təfəkkür, idrak, məntiq, istedad, qabiliyyət sahibi olmaq boş şeylərdir, bunlara dəyər verilmir.

Müəllif deyir ki, dünya siyasi arenasında bir qisim siyasətçilər var ki, siyasəti çox çətinliklə olsa da dərk edə bilirlər, amma Azərbaycandakı "ər-arvad, qohum-quda, qonşu-dost hakimiyyəti" siyasi aləmi başa düşmür, əgər başa düşsəydi seçki ilə bağlı fikirləri hekayəyə bənzəməzdi.

Azalan sürülər, artan ət istehsalı təzadı ...

"Novoye Vremya" qəzetində isə "Azərbaycanın ət bazarı: dəyərləndirmə və proqnoz" sərlövhəli məqalə diqqət çəkir.

Müəllif ət istehsalı sahəsində təzad yaşandığını, rəsmilər ölkənin özünü ət məhsulları ilə 100% təmin etdiyini dedikcə, ət idxalının artdığını bildirir.

"Nəticələrə görə, 2017-ci ildə heyvandarlıq artıb, 540 min ton ət istehsal edilib ki, 2016-cı il ilə müqayisədə 3,2% çoxdur. 2 milyon ton süd istehsal edilib ki, bu da 0,7% çox məhsul deməkdir. 1714 milyon ədəd yumurta istehsalı olub ki, 6,5% artım deməkdir"."

Müəllif rəsmi göstəriciləri nəzərə çatdıraraq etmadsızlıq ifadə edir və problemin mənbəyi kimi heyvan sayının azalmasını göstərərək deyir: "Bu istehsal üçün sürülərin olması zərurətdir. 2016-cı ildə iribuynuzlu heyvanlar arasında 8 min baş azalma baş verib. 2017-ci ildə də bu meyl davam edib azalma 20 min baş təşkil edib. Bu azalma xırdabuynuzlu sürülər içində də olub, əgər 2016-cı ildə bu azalma 65 min baş olubsa, 2017-ci ildə 150 min baş azalma qeydə alınıb".

Məqalə müəllifi deyir ki, bu fonda ət idxalı artmağa və ölkədən kənara daha çox valyuta axınına səbəb olub: "Belə ki, 2014-cü ildə 15,5 min ton ət idxalına 19,5 milyon dollar xərclənib.2016-cı ildə də demək olar ki, ət idxalı və ona xərclənən valyuta həcmi sabit qalıb. 2017-ci ildə isə ət idxalı 40,1 min ton olub və buna 63,1 milyon dollar xərclənib. Beləliklə, ət idxalı ilə bağlı xərclər 1,6 dəfə artıb".

Bu rəqəmlərlə yanaşı müəllif xatırladır ki, kolbasa, sosiska və s. ət məhsulları bura daxil deyil, bu sırada söhbət ancaq ölkəyə idxal edilən ətdən gedir.

Müəllif isə deyir ki, bütün bu rəqəmlərə baxmayaraq, Dövlət Statistika Komitəsinin satışda olan bütün ətin yerli istehsal olduğunu deməsi əsassızdır.

Məqalə müəllifi vurğulayır ki, idxal məhsullarının yerli məhsulu sıxışdırmasına maneçilik yoxdur. Əgər indi idxal edilən ətin xüsusi payı 7%-dirsə, bir il əvvəl 6% idi.

Durumu təhlil edən müəllif deyir ki, Azərbaycanın ət bazarında ət idxalının artması və heyvan sürülərinin sayında azalmalar müşahidə edilir.

Müəllifə görə, hər iki meyl neqativdir və bu iki amilin ölkədə ət istehsalının artması ilə izah edilməsi inandırıcı deyil.

Müəllif həm də xəbərdarlıq edir ki, heyvan sürülərinin azalması gələcəkdə bu artımı bərpa etməyə imkan verməz bir həddə çata bilər.

Müəllif bu halda ya əhalinin vegeterianlığa keçəcəyini, ya da hökumətin bu durumdan çıxış yolu axtarmağa məcbur olacağını bildirir.