'Elina işi': həkimlər ifadə verdi (YENİLƏNİB)

Günün ikinci yarısında Səbail rayon Məhəkəməsində Elina Hacıyevanın işi üzrə məhkəmə prosesi davam etdirildi. Elinanın məktəb yoldaşı A.M deyir ki, o, əsəbiləşəndə

boğazını, əlini kəsirdi. Bir dəfə biologiya dərsində də boğazını kəsibmiş, həmin vaxt müəllimin başı jurnal yazmağa qarışdığına görə bunu görməyib: "Deyirdi ki, özümü kəsəndə xoşuma gəlir. Bilirdim ki, mütəmadi dərman içir. Deyirdi ki, boy və əsəblərə görədi, amma təfərrüatlarını danışmırdı".

Ayselin sözlərinə görə, başqa sinfin şagirdləri onu geyiminə görə incidirdi.

Başqa bir şagird X. M. da sinif yoldaşlarının Elinanın xətrinə dəydiyini söyləyib. Onun sözlərinə görə, Elina heç kimin ondan xoşu gəlmədiyini deyir, əvvəl təhsil aldığı məktəbə qayıtmaq istəyirdi.

Bakı Təhsil İdarəsinin daxili nəzarət sektorunun baş məsləhətçisi Sərxan Rzayev öz ifadələrində bildirib ki, hadisədən sonra məktəbin direktoru Sevinc Abbasova ona zəng eləyib, şagirdlərdən birinin yıxıldığını deyib: "Dedi ki, görünən xəsarət yoxdur, tibb bacısı yardım göstərir. Sonra məlum oldu ki, yıxılmayıb, üçüncü mərtəbədən atıb, dərman içib. Ona dedim ki, Təcili Yardıma xəbər verilsin. Mən özüm də Təhsil Nazirliyinə xəbər verdim. Sonra direktor mənə məlumat verdi ki, xəstəxanaya aparılıb, dərman zəhərlənməsi və çanaq sümüyü sınması diaqnozu qoyulub".

Elinanın bundan öncə də intihara cəhd etməsi barədə onlara heç bir məlumat verilmədiyini deyən şahid vurğulayıb ki, əslində isə verilməliydi: "Təkcə bizə yox, həm də icra hakimiyyətinin yetkinlik yaşına çatmayanlarla iş komissiyasına da məlumat verilməli idi".

Ardınca məhkəmədə Kliniki Tibbi Mərkəzin həkimləri - Kompüter-Tomoqrafiya bölməsinin işçisi Məhəmməd Əmrahov, toksikoloq Faiq Süleymanov, reanimasiya şöbəsinin həkimi Vaqif Rəhimov, reanimotoloq Fazil Alıyev, uşaq cərrahiyyə şöbəsinin müdiri İlqar Haqverdiyev, həmçinin Təcili Tibbi Yardım stansiyasının həkimi Vaqif Mursaqulov şahid kimi dindirilib.

"Çağırış gəldi, dedilər ki, məktəbdə uşağın vəziyyəti pisdi. Biz gedəndə divanda uzanmışdı. Dedi ki, axşam və səhər çoxlu ketatfen içib. Soruşdum ki, niyə belə elədin? Dedi ki, məni nə evdə istəyən var, nə də məktəbdə. Bildirdi ki, bundan əvvəl də intihara cəhd edib, ikinci dəfə on beş gündür intihar barədə düşünür. Dərman içdiyini dediyinə görə toksikologiyaya aparılmasını istədim", - Təcili Tibbi Yardım stansiyasının həkimi Vaqif Mursaqulov belə deyib.

Toksikoloq Faiq Süleymanov bildirib ki, Elina xəstəxanada ona axşam 30, səhər də 30 həb içdiyini desə də, inanmayıb. Çünki bu halda o, dərin yuxuda olmalıydı: "Amma onda yüngül zəhərlənmə var idi. Mən müalicəni yazıb çıxdım. Qalan müalicə reanimasiyada aparılmalıydı".

Digər həkimlərin sözlərinə görə, xəstəxanada Elinanın daxili orqanlarının ilkin müayinəsi zamanı ağciyərdə ödəm (maye yığıntısı) aşkarlanıb. Vaqif Rəhmov deyir ki, ağciyər ödəmi diaqnozu qoyulan xəstələrin təxminən 46 faizini xilas etmək mümkün olmur.

Ancaq reanimotoloq Fazil Alıyev deyir ki, həmin gecə onun növbəsində reanimasiyada saxlanılarkən Elinanın vəziyyəti stabil olub: "Təzyiqi düşmüşdü 70-40-a. Daxili qanaxmadan şübhələnib UZİ-yə göndərdim. Heç nə göstərmədi, qarın boşluğu təmiz idi. Mənim növbəmdə prokurorluğa ifadə verib. Ertəsi gün səhər saat 9-da başqa həkimə təhvil vermişəm. Reanimasiya xəstəsi üçün vəziyyəti stabil idi. Əkrəm həkim səhər baxış keçirəndə dedi ki, bu dinamika ilə getsə, bir gün sonra palataya köçürülə bilər".

Məhkəmə prosesi sentyabrın 27-də davam edəcək.

* * *

2019 Sentyabr 25 (Çərşənbə) 23:30:12

Elina Hacıyevanın ölümü ilə bağlı iş üzrə prosesdə

Bakı/25.09.19/Turan: Bakının 162 saylı orta məktəbinin 8-ci sinif şagirdi Elina Hacıyevanın ölümü haqqında iş üzrə proses şahid ifadələri ilə davam edir.

2019-cu il aprelin 4-də 162 nömrəli məktəbin şagirdi, 2004-cü il təvəllüdlü Elina Hacıyeva məktəbin üçüncü mərtəbəsindən özünü atıb. Faktla bağlı Bakı şəhər Prokurorluğunda CM-in 125-ci (özünü öldürmə həddinə çatdırma) maddəsi ilə cinayət işi açılıb.

Sonradan məktəbin direktoru Abbasova iş üzrə məsuliyyətə cəlb edilib. Ona qarşı CM-in 143 və 314.2-ci maddələri ilə ittiham irəli sürülüb. Amma 125-ci maddə ilə heç kim məsuliyyətə cəlb edilməyib.

Sentyabrın 25-də Səbail rayon məhkəməsində keçirilən iclasın əvvəlində zərərçəkmiş tərəfin vəkilləri vəsatətlər verib. Onlar təqsirləndirilən şəxs, məktəbin keçmiş direktoru Sevinc Abbasova barəsində qətimkan tədbirinin dəyişdirilməsini və onun ev dustaqlığından həbsə keçirilməsini xahiş ediblər. Vəkillər bunu təqsirləndirilən şəxsin məhkəmə iclaslarından əvvəl və sonra KİV-ə müsahibə verərək, təqsirsiz olduğunu bildirməsi ilə əsaslandırıblar.

Bundan başqa, müdafiə tərəfin əlində Abbasovanın məhkəmə iclaslarından əvvəl məktəbin şagirdləri və müəllimləri ilə əlaqə saxlayaraq, onlara öz xeyrinə təsir göstərməsi barədə faktlar var. Məhkəmə vəsatəti təmin etməyib.

Zərərçəkmiş tərəfin vəkilləri şahidlərin - Hacıyevanın öldüyü xəstəxananın həkimlərinin ifadələrinin audio və videoçəkilişinin aparılması barədə də vəsatət qaldırıblar. Onlar bunu həkimlərin sonradan təhrif edilə biləcək tibbi terminlərdən istifadə edə biləcəkləri ilə əsaslandırıblar.

Daha sonra prosesdə Hacıyevanın sinif yoldaşları, dostları ifadə veriblər. Onlar bildiriblər ki, qız məktəbdə basqı və təzyiqlərə məruz qalıb. Hacıyevanın əvvəl oxuduğu məktəbdən sinif yoldaşı Elinanın yeni məktəbdə qəbul edilməməsindən şikayət etdiyini deyib.

Hacıyevanın anasının rəfiqəsi Leyla Şirinova bildirib ki, sinif rəhbəri Elinanı saçlarını boyadığına görə sinif yoldaşları qarşısında alçaldıb. Şirinovanın sözlərinə görə, sinif rəhbəri Elina və onun ailəsi haqqında pis danışır, uşaqları Elina ilə ünsiyyət qurmamağa təşviq edirdi.

Məktəb direktorunun katibəsi Nigar Məmmədova bildirib ki, qız aprelin 4-də səhər saat 10.00 radələrində özünü atıb, "təcili yardım" isə 12.00 radələrində çağırılıb. Onun sözlərinə görə, qız bu hərəkətinin səbəbini izah edə bilməyib və dərman içdiyini bildirib.

1 saylı şəhər Kliniki Mərkəzinin cərrahı Əkrəm Çovdarov bildirib ki, xəstə daxil olduqda ondan təhlil üçün qan nümunəsi götürülüb, rentgen çəkilib və müayinə cərrahi əməliyyata ehtiyac olmadığını göstərib. Ona sistem qoşulub.

Çovdarovun sözlərinə görə, Hacıyeva reanimasiyaya yerləşdirilib. Onda qanaxma olmayıb, ağ ciyərində maye toplantısı müşahidə edilməyib. Həkim təsdiq edib ki, Səbail rayon icra hakiminin müavini Xalidə bayramova reanimasiyaya buraxılıb, qızın anası isə buraxılmayıb.

Həkimin sözlərinə görə, Hacıyevanın ölüm səbəbi kimi kəskin tənəffüs çatışmazlığı, kəllə-beyin travması, ağ ciyərlərin zədələnməsi və s. göstərilib. Əsas səbəb kimi isə kəllə-beyin travması göstərilib.

Zərərçəkmiş tərəfin vəkilləri ilkin diaqnoz və məhkəmə-tibbi ekspertizanın rəyi arasındakı fərqin səbəbini soruşublar. Həkim bu suala cavab verə bilməyib. Məhkəmə iclası davam edir. -06D-