Emin Millinin qaynı məhkəmə zalından azadlığa buraxılıb

Bu gün Ağır Cinayətlər Məhkəməsində qanunsuz narkotik maddə alverində ittiham olunan Nazim Ağabəyovun (“Meydan”TV-nin rəhbəri Emin Millinin qaynı) işi üzrə proses baş çatıb.

Məhkəmə ittihamı daha yüngül maddəyə tövsif edərək şərti cəza təyin edib.

Vəkil Adil İsmayılov məhkəmədən N.Ağabəyova bəraət verilməsini istəyib. Belə ki, onun hərəkətlərində cinayət tərkibi yoxdur. İstintaq isə kobud pozuntularla keçirilib. Ağabəyov saxlandıqdan sonra etirafedici ifadələr almaq üçün ona təzyiq göstərilib, təhdid edilib, ailə üzvlərinə problem yaranacağı ilə bğlı hədələnib. Onu məcbur ediblər ki, dövlət vəkilinin ayrılması haqda müraciəti imzalasın.

Ağabəyov bildirib ki, heç zaman cinayətkar olmayıb. “Mən 20 il iş stajı olan mütəxəssisəm. Xəstə uşağım var. Heç zaman narkotik maddə alveri ilə məşğul olmamışam, spirtli içki içməmişəm, siqaret çəkməmişəm. Əgər həbsimin səbəbi Emin Milli ilə qohumluğumdursa, onun müxalifətçi fəaliyyətinə mənim heç bir aidiyyatım yoxdur. Mən heç zaman müxalifətçi olmamışam. Mən həmişə dövləti dəstəkləmişəm və müntəzəm vergi ödəmişəm”, - Ağabəyov vurğulayıb.

Hakim Əfqan Məmmədov belə rəyə gəlib ki, Ağabəyovdan 6,013 qr. heroin tapılması məhkəmə istintaqı zamanı öz təsdiqini tapıb. Lakin onun satış məqsədilə əldə olunması sübuta yetirilməyib.

Odur ki, məhkəmə 234,4.3 (külli miqdarda narkotik maddə alveri) maddəsini 234.1-ci maddəyə  (qanunsuz narkotik maddə saxlanması) tövsif edib və üç il müddətinə azadlıqdan məhrumetmə cəzası təyin edib.  Lakin yüngülləşdirici şərait nəzərə alınaraq 2 il sınaq müddəti olmaqla şərti cəza haqqında CM-in 70-ci maddəsi tətbiq edilib.

N.Ağabəyov məhkəmə zalından buraxılıb.02D-