E.Qəhrəmandan əvvəlcə F.Gülənlə əlaqələri haqqında ifadə tələb ediblər

Dekabrın 21-də Bakı Ağır Cinayətlər Məhkəməsində Azad Məcidovun sədrliyi ilə NİDA hərəkatının fəalı Elgiz Qəhrəmanın işi üzrə məhkəmə istintaqı başlayıb. 

Prosesdə ittiham aktı oxunub, ona əsasən, Qəhrəman küçədə 3.315 qr heroin paketi "tapıb" və narkotik maddədən "şəxsi istifadə məqsədilə" yararlanmaq niyyətində idi.  

Eyni zamanda, polis fəalı məhz böyük ölçüdə narkotik maddə ticarətində ittiham edib. 

Qəhrəman prosesdə irəli sürülmüş ittihamları rədd edib və bildirib ki, etirafedici ifadələri işgəncə altında verib.

Saxlanıldıqdan sonra Qəhrəmanın mənzilində axtarış zamanı onun evinə Nurçuluq cərəyanının banisi olan ilahiyyatçı Səid Nursinin kitabları qoyulub. 

Bundan sonra Qəhrəmandan Fətullah Gülənin tərəfdarı olaraq (nurçu) bu ilin iyulunda Türkiyədə dövlət çevrilişi cəhdini dəstəklədiyini və Azərbaycanda da bunun təkrar olunmasını istədiyini etiraf etməyi tələb ediblər. O etiraz etdikdə dəyənəklə başına, cinsiyyət orqanına və ayaqlarına vurublar. 

Qəhrəmanı bu barədə yazılı etirafedici ifadə verməyə, habelə videokamera qarşısında onları səsləndirməyə məcbur ediblər. 

"Amma sonradan onlar məni Gülənlə əlaqələrdə ittiham etmək fikrindən daşınıblar... Lakin "bandotdeldə" (Mütəşəkkil Cinayətkarlığa qarşı Mübarizə Baş İdarəsi) məni burada danışmaq istəmədiyim insan ləyaqətini alçaldan hərəkətlərə məruz qoyublar. İndiyədək həbsimin səbəbi mənə aydın deyil. Yazılarımda təhqir olmayıb. Dostlarım zarafatla məni "Elgiz başqan" adlandırırdılar. Bəlkə də onlar buradan belə nəticə çıxarıblar ki, mən hansısa böyük təşkilata rəhbərlik edirəm", deyə Qəhrəman məhkəmədə bildirib. 

Daha sonra prosesdə ittiham şahidlərinin - Mütəşəkkil Cinayətkarlığa qarşı Mübarizə Baş İdarəsinin əməkdaşları Kamil Məmmədov və Mehman Teymurovun, habelə hal şahidləri Rəşad Musayev və Tural Rəsulovun ifadələri dinlənilib. 

Müdafiə tərəfi Mütəşəkkil Cinayətkarlığa qarşı Mübarizə Baş İdarəsinin şöbə müdiri Kərim Əlimərdanovun və baş əməliyyat səlahiyyətlisi Şahlar Cəfərovun əlavə şahid qismində çağırılması barədə vəsatət qaldırıb. Çünki Qəhrəmanın sözlərinə görə, bu şəxslər onu işgəncələrə məruz qoyublar. 

Məhkəmə vəsatəti təmin edib və növbəti iclası dekabrın 26-na təyin edib. -06D-