«Nardaran işi üzrə» məhkəmə prosesində

Dekabrın 21-i Bakı Ağır Cinayətlər məhkəməsində Fuad Qəhrəmanlı, Tale Bağırzadə və digər təqsirləndirilən şəxslərin məhkəmə prosesi davam edib.
Əlövsət Abbasovun sədrlik etdiyi məhkəmə prosesində təqsirləndirilən şəxslər və ailə üzvlərinin iştirakı olmadan keçirilib.
Vəkil Yalçın İmanov bildirib:  "14 dekabrda Tale Bağırzadə məhkəmədən kənarlaşdırıldı. Həmin gündən onların iştirakı olmadan məhkəmə prosesi keçirilir. Onları gətirib məhkəmənin zirzəmisində saxlayırlar. Zirzəmi soyuq olduğundan Artıq 4 təqsirləndirilən şəxsin səhhətində problemlər yaranıb. Biz sizə vəsatət veririk ki, onların iştirakı təmin olunsun. Amma siz nədənsə vəsatəti təmin etmirsiz. Əgər onlar məhkəmə zalına buraxılmırlarsa, gətirilib zirzəmidə soyuqda saxlanılmasınlar. Onsuz onlara yetərincə işgəncə verilib. Bu hərəkətidə işgəncənin bir növü olaraq hesab edirəm".

Daha sonra vəkil Fariz Namazlı hakimə bildirib ki, təqsirləndirilən şəxslər nəyəsə etiraz edən kimi məhkəmədən uzaqlaşdırırsınız. "Onlar o zaman məhkəmədən uzaqlaşdırılmalıdır ki, məhkəmə qayda-qanunlarına əməl etməyələr. Onlar sadecə sözləriylə etiraz edirlər".
Vəkil Zibeydə Sadıqovun keçən məhkəmə prosesində Rasim Cəbrayılov ilə "bandatdel"in əməkdaşı İbrahim Kazımovun(Şrek ləqəbli) çarpaz dindirilməsi üçün verdiyi vəsatət təmin olunub.
Təqsirləndirilən şəxs Rasim Cəbrayılov zala gətirildi və İ. Kazımov ilə çarpaz dindirildi.

Dindirilmə zamanı R. Cəbrayılov deyib:  "Mən tutulan zaman mətbəxdə olmuşam. Mətbəxə 3 maskalı şəxs daxil oldu. Mənim əlimi bağlayıb həyətdə gözlədiblər. Sonra məni maşını mindirdilər. Başladılar orda məni döyməyə. Elə bil kartof kisəsiyəm, adam deyilem. Biz ora dövlət çevrilişi etməyə getməmişik, Namaz qılmağa getmişdik. Namaz qılanın əlində silah olmaz".
İbrahim Kazımov isə Rasimin ona güllə atdığını və onu özü zərərsizləşdirdiyini bildirib. "Biz içəri girəndə dedik ki, biz polis işçisiyik atəş açmayın. Lakin onlar bizi eşitmədi. Silah, qumbara atmağa başladılar".
Rasim Cəbrayılov bütün bunların yalan olduğunu deyib. "Məni döyən, işgəncə verən şəxs burda yalan danışır. Əgər düz danışmayacaqsansa niyə gəlib çarpaz ifadə verirsən? Nədən qorxursan, niyə düzünü demirsən? Hakim bəy bandatdeldən gələn bütün şəxslərin hamısı yalan ifadələr verirlər. Yalan ayaq tutub yerimir. Bu yalanlara görə cəhənnəmdə yanacaqsız".

Daha sonra R. Cəbrayılov orada hal şahidlərinin olmadığını, üstlərinin “bandatdeldə” yoxlanıldığını bildirib. "Mənim üstümdə üzük, telefon və 3 manat pul olub.  Məni dindiriəndə vəkili çıxardırdılar. İslam Ağabəyovla bu şəxs mənə kitab göstərdilər. Dedilər ki, Hacı Talehin çağırış kitabıdı. Mən boynuma götürmürdüm deyə saldılar məni otağa. Başıma selofan keçirib ayağıma dubinka ilə vurdular ki, niyə boynuva almırsan. Orada hətta məni presləyiblər. Erməninin azərbaycan xalqına etmədiyini, bunlar bizə ediblər".
Çarpaz dindirilmə başa çatdıqdan sonra Rasim Cəbrayılov etiraz etsədə, zor gücünə İbrahim Kazımovun çıxdığı qapıdan çıxartdılar".
Fasilədən sonra Yalçın İmanov hakimə bildirdi ki, təqsirləndirilən şəxslər məhkəmədə iştirak etmək üçün ərizə yazıblar. Lakin hakim ərizəni təmin etmədi.
Daha sonra vəkillər vəsatətlərlə bağlı çıxış etsələrdə, vəsatətləri qəbul olunmayıb.
Növbəti məhkəmə prosesi dekabrın 23-ə təyin edilib.-36d-