Əvəz Zeynallı həmkarlarını həmrəy olmamaqda qınayıb

“Xural” qəzetinin baş redaktoru Əvəz Zeynallı jurnalist həmkarlarının və hüquq müdafiəçilərinin onun məhkəmə prosesinə yanaşmasından narazılığını bildirib.  

Çərşənbə günü Bakı Ağır Cinayətlərə dair Məhkəmədə iclasdan əvvəl Ə.Zeynallı bəyanat verərək müstəqil və müxalifət KİV, jurnalist təşkilatlarının rəhbərlərini və hüquq müdafiəçilərini onunla həmrəy olmamaqda qınayıb. O, hüquq müdafiəçilərinin və media birliyi nümayəndələrinin məhkəmə iclaslarına gəlməməsindən narazılığını bildirib.

Ə.Zeynallının fikrincə, iyunda Mətbuat Şurasında Prezident Administrasiyasının şöbə müdiri Əli Həsənovun KİV rəhbərləri ilə görüşündən sonra onun işinə diqqət azalıb.

Proses zamanı Ə.Zeynallı yenidən təkrar edib ki, ötən iclasda dinlənilən audioyazıdakı (Gülər Əhmədova ilə söhbət) səsə onun səsi deyil. 

Ə.Zeynallı cinayət işinin saxtalaşdırıldığını qeyd edib. Buna sübutlardan biri kimi iş materiallarında ona aid olmayan sənədlərin olduğunu göstərib. 

Hakim Allahverdiyeva növbəti məhkəmə iclasını yanvarın 9-na təyin edib.

“Xural” qəzetinin baş redaktorunun vəzifəsini icra edən Əfqan Muxtarlı Turan-ın müxbiri ilə söhbətində bildirib ki, məhkəmə əsassız olaraq 7 aydan çoxdur ki, yubanır.

Hökmün oxunması qəsdən 2013-cü ilə təxirə salınıb ki, Ə.Zeynallı yeni ilqabağı əfvə daxil edilməsin.06D—