Azərbaycan tərəfi Gürcüstanın baş naziri Bidzina İvanişvilini xüsusi ehtiramla qəbul edib

Tbilisi/27.12.12/Turan-BSPRESS: Azərbaycan tərəfi Gürcüstanın baş naziri Bidzina İvanişvilini xüsusi ehtiramla qəbul edib. Bu barədə ölkənin xarici işlər naziri Mayya Pancikidze Bakı səfərinin yekunları ilə bağlı jurnalistlərə bildirib.

M. Pancikidze çərşənbə günü Azərbaycana rəsmi səfərə gələn hökumət nümayəndə heyətinin tərkibində olub.

“Bu, Gürcüstanın baş nazirinin Azərbaycana ilk səfəri idi. Onu xüsusi ehtiramla qəbul etdilər və bu, bizim üçün çox xoşdur”, - M. Pancikidze vurğulayıb.

B.İvanişvili isə bildirib ki, Bakı-Tbilisi-Qars layihəsinin reallaşması ilə bağlı problem yoxdur.

Qazın tarifləri barədə sualın cavabında baş nazir deyib ki, Azərbaycana Gürcüstana qazı olduqca münasib qiymətə satır. “Mən Gürcüstan üçün yaradılan şəraitə görə 

Azərbaycan prezidentinə və hökumət başçısına təşəkkürümü bildirdim”, - o qeyd edib.

Baş nazir Azərbaycanın ali rəhbərliyi ilə görüşlərindən aldığı təəssüratları jurnalistlərlə bölüşüb: “Bu, öz xalqı üçün böyük işlər görən əsil dövlətdir”.  Azərbaycan rəhbərliyi ölkənin idarə edilməsinə uzaqgörənliklə yanaşır. 

“Prezidentlə və baş nazirlə görüşdən sonra əmin oldum ki, ölkələrimiz arasında yaxşı münasibətlər var. Əgər aramızda hər hansı kiçik münaqişə yaranarsa, biz onu dostluq şəraitində həll edə bilərik”, - o vurğulayıb.-02D-